Халқаро илмий семинардаги иштирок

Бош прокуратура Академиясининг профессор-ўқитувчилари Ўзбекистон Адвокатлар Палатаси ҳамда “Минтақавий мулоқот” ХННТнинг Ўзбекистондаги ваколатхонаси билан ҳамкорликда жорий йилнинг 16 июль куни онлайн режимда ўтказилган “Одил судлов ва юридик ёрдам: халқаро стандартлар, миллий ва хорижий тажриба” мавзусидаги халқаро илмий семинарда иштирок этдилар.

Тадбирда шунингдек Ўзбекистон Республикаси Бош прокуратураси ходимлари, Ўзбекистон Республикаси Судьялар олий кенгаши ҳузуридаги Судьялар олий мактаби вакиллари, Ўзбекистон Республикаси Олий судининг судьялари, халқаро экспертлар – АҚШнинг Миннесота округи бўйича Бош федерал судьяси Джон Танхайм, Германия давлати Федерал адвокатлар коллегиясининг халқаро ҳуқуқий  ҳамкорлик бўйича директори Вероника Хоррер, АҚШ Вашингтон шаҳрининг Давлат ҳимоячилари хизмати суд бўлимининг бошлиғи Дэвид Найт, АҚШ Бостон шаҳрининг жамоат ҳимоячилари бўлими Бош юристконсульти ўринбосари Рэнди Гойа, Словениялик эксперт Горан Клеменчичлар қатнашдилар.

Тадбирда 2017–2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган қонун устуворлигини таъминлаш ва суд-ҳуқуқ тизимини янада ислоҳ қилишнинг алоҳида йўналишларидан бири бўлган адвокатура институтини такомиллаштириш, жиноий, маъмурий, фуқаролик ва иқтисодий суд ишларини юритишда юридик ёрдам кўрсатиш масалалари ҳамда бу борадаги миллий ва ҳорижий давлатлар тажрибаси муҳокама этилди.

Иштирокчилар диққатига миллий қонунчиликнинг одил судлов жараёнида адвокатлар иштирокига оид нормаларининг таҳлили келтирилди.

Ўз навбатида хорижий экспертлар Германия, Словения, АҚШ давлатларининг одил судлов жараёнида адвокатларнинг иштироки хусусида ҳорижий қонунчилик нормалари ва шаклланган тажриба хусусида маълумот бериб ўтдилар.

Тадбир давомида иштирокчиларнинг диққатига тақдим этилган маърузалар бўйича қизғин мунозаралар бўлиб ўтди.