Оғир жудолик

3-даражали Давлат адлия маслаҳатчиси,  юридик фанлар номзоди, узоқ йиллар давомида Қорақалпоғистон Республикаси прокурори, Бош прокурор ўринбосари, Бош прокуратура Олий ўқув курслари  бошлиғи лавозимларида фаолият юритган Хакимбай Аширович Халимов ҳаётдан кўз юмди. У кўп сонли ҳуқуқшунос-олимлар, прокуратура ва бошқа ҳуқуқни муҳофаза қилувчи органлар ходимлари учун устоз сифатида танилган эди.  

Хакимбай Аширович ўзининг ҳаётини қонун ва адолат йўлида халқимизга хизмат қилишга бахшида этди. У прокуратура органлари тизимида турли лавозимларда юксак касбий маҳорат, адолатлилик, қатъият ва шу билан билан инсонийлик фазилатлари билан эътироф қозонди.  

Сўнгги йилларда Хакимбай Аширович Қорақалпоғистон Республикаси прокуратураси бўлим бошлиғи лавозимида хизматни ўтаб, ўзининг кўп йиллик тажрибасини қонун устуворлигини ва инсон ҳуқуқларини таъминлаш, том маънодаги халқ прокуратурасини яратиш йўлида қўллаб келди.

Хакимбай Аширович юридик фан ва ҳуқуқни қўллаш амалиёти ривожига салмоқли ҳисса қўшди. У Ўзбекистон Республикаси Конституциясининг яратилишида бевосита иштирок этди, қатор ижтимоий объектлар, шу жумладан Қорақалпоғистондаги Меҳрибонлик уйи қурилишининг ташаббускори бўлди. 

Касбий фаолиятида Хакимбай Аширович прокуратура органлари шахсий таркибининг касбий маҳоратини юксалтириш, маданий ўсиши ва доимий тарзда ўзининг устида ишлашига алоҳида эътибор қаратиб, бу борада шахсий ибрат кўрсатиб келди.

Фидокорона меҳнати учун Хакимбай Аширович Халимов Ўзбекистон Республикаси Президенти Фармонларига асосан «Меҳнат шуҳрати», II даражали «Шон-шараф» ордени билан, шунингдек Бош прокурор буйруғларига асосан «Ўзбекистон Республикаси прокуратураси фахрий ходими» ҳамда «Аъло хизматлари учун» кўкрак нишонлари билан тақдирланган.

Ўз касбий ва инсоний фазилатлари учун ҳамкасблари орасида ҳурмат ва эътироф қозонган.

66 ёшида оғир хасталик туфайли ҳаётдан кўз юмган Хакимбай Аширович Халимовнинг ёрқин хотираси ҳалол, виждонли ва масъулиятли ходим, олийжаноб ва камтарин инсон, тажрибали устоз ҳамда адолатли раҳбар сифатида ҳамкасблар юрагида умрбод муҳрланиб қолади.

Бош прокуратура Академияси жамоаси Хакимбай Аширович Халимовнинг оила аъзоларига ва яқинларига чуқур таъзия ва ҳамдардлик билдиради.