Ижро ишини юритишда процессуал ҳужжатлар тузишнинг ягона амалиёти методик жиҳатдан таъминланди

Прокуратура органларида қонунчиликни такомиллаштириш ва ягона ҳуқуқни қўллаш амалиётини шакллантириш бўйича илмий асосланган хулоса ва тавсиялар ишлаб чиқиш Бош прокуратура Академиясининг асосий вазифаларидан биридир.

Мазкур вазифалар ижросини таъминлаш мақсадида Академия томонидан Бош прокуратура ҳузуридаги Мажбурий ижро бюросининг суд ҳужжатлари ва бошқа органлар ҳужжатларини ижро этиш фаолияти мунтазам равишда ўрганилиб, давлат ижрочилари томонидан қонун ҳужжатларини амалиётга татбиқ этишда йўл қўйилаётган хато ва камчиликлар таҳлил қилиниб, соҳани янада такомиллаштиришга қаратилган муайян илмий тадқиқотлар олиб борилмоқда.

Хусусан, Академия томонидан ижро ҳужжатларига қўйиладиган барча қонун талабларига мувофиқ “Мажбурий ижро бюросида фойдаланиладиган процессуал ҳужжатлар намуналари” ишлаб чиқилди.

Ушбу услубий қўлланма Мажбурий ижро бюросининг давлат ижрочилари, шунингдек бошқа ваколатли ходимлари томонидан процессуал ҳужжатлар расмийлаштиришда ягона амалиётни таъминлашга, шунингдек ҳужжатлар билан ишлашда замонавий ахборот технологияларидан фойдаланган ҳолда белгиланган стандартлар асосида иш юритувни янада такомиллаштиришга қаратилган.

Услубий қўлланма Бюро ҳайъатининг қарори билан тасдиқланиб, фаолиятда қўлланиш учун барча давлат ижрочиларига юборилди.