Кибержиноятларга қарши курашиш соҳаси амалиётчиларининг салоҳиятини ошириш – давр талаби

Давлат ва шахс фаолиятининг барча соҳаларини ахборот ва телекоммуникация тизимлари тобора қамраб олаётган ахборот жамиятининг тезкор ривожланиш даврида юқори технологияларни қўллаган ҳолда жиноятлар содир этишнинг янги усуллари ривожланиб бормоқда.

Киберхавфсизлик соҳасида ўсиб бораётган таҳдидларга жавобан ЕХҲТнинг Ўзбекистондаги лойиҳалар координатори офиси кўмагида Бош прокуратура Академияси томонидан “Ахборот технологиялари соҳасидаги жиноятлар (кибержиноятлар): турлари, квалификацияси ва тергов ҳаракатларини ўтказиш стратегияси” ўқув қўлланмаси тайёрланди.

Мазкур қўлланма прокуратура ва бошқа ваколатли органлар ходимларининг миллий ва трансмиллий даражада кибержиноятларни тергов қилиш борасида билим ва амалий кўникмалар мажмуини шакллантиришга йўналтирилган.

Ўқув қўлланмада кибержиноятларнинг жиноят-ҳуқуқий тавсифи очиб берилиши билан бир қаторда тергов ҳаракатларини ўтказишнинг тактик масалалари, рақамли криминалистиканинг амалий жиҳатлари ёритиб берилган, шунингдек кибержиноятларни тергов қилишда халқаро ҳамкорликнинг асосий механизмлари кўриб чиқилган.