Халқаро стандартларга асосланган коррупцияга қарши таълим

Академик мобилликни ривожлантириш ва кредит-модуль тизимини жорий этиш доирасида Академияда Лунд университети (Швеция) профессорлари Манс Свенссон ва Рустам Уринбаев томонидан “Коррупцияга қарши курашиш” мутахассислиги бўйича магистратура босқичи талабалари учун “Ҳуқуқ, жамият ва коррупция”курси бошланди.

Курс тингловчиларнинг коррупцияга қарши курашиш соҳасида илмий ва ҳуқуқий полемика, коррупцияни ўрганишнинг назарий, методологик ва ахлоқий масалалари, шунингдек коррупциянинг ижтимоий ва ҳуқуқий ислоҳотларни амалга ошириш жараёнига таъсири нуқтаи назаридан глобал индикаторларни қўллаш борасидаги билим ва кўникмаларини мустаҳкамлашга қаратилган.

Курсни муваффақиятли якунлашнинг асосий мезони тингловчилар томонидан саккизта кредит – анъанавий ўқув иши ҳажми шартли бирлигини ўзлаштиришдир.

Курс якунида тингловчилар коррупциянинг сабаб ва оқибатларини таҳлил қилиш ҳамда ижтимоий-ҳуқуқий ва фанлараро нуқтаи назардан коррупцияга қарши курашиш стратегиясини ишлаб чиқиш бўйича ўзлаштирган кўникмаларини намоён этишлари лозим.