Раҳбар кадрларни қайта тайёрлаш курсига қабул бўйича танловнинг якуний босқичи

Бош прокуратура Академиясида 2020 йил 11 ноябрь куни видеоконференцалоқа режимида прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курсига қабул қилиш бўйича танловнинг якуний босқичи ниҳоясига етди.

Масофавий таълим ҳамда оралиқ назоратдан иборат бўлган олдинги босқичларни муваффақиятли якунлаган 50 нафар номзод якуний босқичга ўтди.

Бош прокурор буйруғига асосан ташкил этилган, Бош прокурор ўринбосари Э.Т.Юлдашев раислигида Академия ҳамда Бош прокуратуранинг тегишли тармоқлари раҳбарларидан иборат махсус комиссия томонидан номзодлар тайёрлаган тақдимот ишлари (таҳлилий иш, норматив-ҳуқуқий ҳужжат лойиҳаси, амалий қўлланма) кўриб чиқилган.

Номзодларнинг тақдимот ишларига қўйилган асосий талаб улар фаолият юритаётган соҳада мавжуд қонунчилик ва ҳуқуқни қўллаш амалиёти муаммоларини ўрганиш ва таҳлил қилиш, шунингдек уларни бартараф этишга доир аниқ чора-тадбирларни ишлаб чиқишдан иборат. Шу тариқа таълим жараёнининг прокуратура органлари ходимлари амалий фаолияти билан узвий боғлиқлиги таъминланиб, бу ўз навбатида қайта тайёрлаш дастурлари самарадорлигини белгилаб берувчи асосий омиллардан бири сифатида хизмат қилади.