“Жаҳон етакчи амалиётлари асосида кадрлар заҳирасини шакллантириш тизими” номли монография тайёрланди

Бош прокуратура Академияси томонидан “Жаҳон етакчи амалиётлари асосида давлат хизмати кадрлар заҳирасини шакллантириш тизими” номли монография тайёрланди.

Монографияда ҳозирги замонда энг долзарб бўлиб турган муаммолардан бири – давлат хизмати ҳамда прокуратура органлари тизимида кадрлар заҳирасини шакллантириш масаласи илмий тадқиқот натижалари асосида тизимли ёритилган.

Муаммога инновацион метод – бошқарув бўйича жаҳон етакчи амалиётларини бенчмаркинг методи асосида ўрганиш орқали ёндашилган. Бенчмаркингга асосланиб прокуратура тизимида раҳбарлар эга бўлиши керак бўлган компетенциялар аниқланган ва уларни шакллантириш дастури ишлаб чиқилган.

Давлат хизмати тизимида фаолият кўрсатадиган раҳбарлар компетенцияларини шакллантиришда уч босқич: психодиагностика, ўқитиш ва психологик ҳамроҳлик босқичлари қамраб олинган Модель таклиф қилинган.

Монографияда ёритилган илмий натижаларнинг илмий асосланганлиги ва амалиётга йўналтирилганлиги илмий тадқиқотнинг давлат хизмати тизимида кадрлар заҳираси билан ишлашда ўта муҳим амалий аҳамиятга эга эканлигини кўрсатади.