Академик ҳамжамият ва фуқаролик жамияти саъй-ҳаракатларини бирлаштириш

2020 йил 19 ноябрь куни Бош прокуратура Академиясида “Юксалиш” умуммиллий ҳаракати ҳамда Бош прокуратура Академияси ўртасида ҳамкорлик тўғрисидаги меморандум имзоланишига бағишланган тадбир бўлиб ўтди.

Меморандумни имзолаш маросимида Академия бошлиғи Е.В.Коленко ҳамда “Юксалиш” умуммилий ҳаракати раиси Б.Бекмуродов иштирок этдилар.

Учрашув давомида томонлар ўзаро манфаатли ҳамкорлик йўналишларини муҳокама қилдилар ҳамда давлат ва жамиятнинг барқарор ривожланишига кўмаклашишга йўналтирилган ўзаро манфаатли ва самарали ҳамкорлик қилишга  тайёр эканликларини билдирдилар.

Томонлар илмий ва таҳлилий соҳаларда академик ҳамжамият ва фуқаролик жамияти институтларининг саъй-ҳаракатларини бирлаштириш ҳаётнинг барча жабҳаларида изчил ислоҳотларни чуқурлаштириш, очиқ демократик жамиятни шакллантириш ва қонун устуворлигини таъминлаш бўйича ишончли ва самарали тавсиялар ишлаб чиқишга хизмат қилади, деган фикрни якдиллик билан таъкидладилар.

Томонларнинг эксперт салоҳиятини бирлаштириш манфаатдор томонларнинг очиқ мулоқоти ва ҳамкорлиги платформасини кенгайтиришга, жамоатчилик назоратининг самарали механизмларини жорий этишга, жамоат хавфсизлигини таъминлаш, ҳуқуқбузарликларни барвақт олдини олиш ҳамда жиноятчилик ва коррупцияга қарши кураш чоралари самарадорлигини оширишга кўмаклашади.

Имзоланган Меморандум ўзаро ҳамкорликнинг асосий йўналишларини белгилаб, ҳамкорликни янада кенгайтиришга хизмат қилади.