“Юридик кадрларни тайёрлаш, қайта тайёрлаш ва малакасини ошириш: миллий ва хорижий тажриба” мавзусида илмий-амалий конференция ўтказилди

2020 йил 30 ноябрь куни Бош прокуратура Академияси томонидан халқаро экспертлар иштирокида “Юридик кадрларни тайёрлаш, қайта тайёрлаш ва малакасини ошириш: миллий ва хорижий тажриба” мавзусида халқаро илмий-амалий конференция ўтказилди.

Конференция ишида БМТнинг Инсон ҳуқуқлари бўйича Олий комиссари бошқармасининг Марказий Осиёдаги минтақавий вакили Ришард Коменда, Европа Кенгашининг Шарқий ҳамкорлик бўлими раҳбари Т.Карапетян, Европа Кенгашининг лойиҳалар координатори К.Хохлова, ЮНЕСКОнинг Таълимда информацион технологиялари институтининг рақамли педагогика ва ўқув материаллари бўлими мутахассиси Д.Капелюшник ва бошқалар иштирок этди.

Шунингдек, тадбирда миллий илмий-тадқиқот муассасалари, Инсон ҳуқуқлари бўйича Ўзбекистон Республикаси Миллий маркази, Адвокатлар палатаси, Олий Мажлис ҳузуридаги Қонунчилик муаммолари ва парламент тадқиқотлари институти, Судьялар олий кенгаши ҳузуридаги Судьялар олий мактаби, ИИВ Академияси, ТДЮУ ва унинг Ихтисослаштирилган филиали, ЖИДУ, ЮМОМ, Бердақ номидаги ҚДУ, СамДУ, НамДУ вакиллари қатнашди.

Тадбирнинг асосий мақсади юридик кадрларни тайёрлаш, қайта тайёрлаш ва малакасини ошириш тизимининг ҳолати ва истиқболларини халқаро ва идоралараро экспертлар иштирокида муҳокама қилишдан иборат.

Муҳокама ва мунозаралар жараёнида юридик кадрларни тайёрлаш, қайта тайёрлаш ва малакасини ошириш, рақамли педагогикани жорий этиш ва ривожлантириш, масофавий ўқитиш, катта ёшдагилар таълими сифатини такомиллаштириш, шунингдек барқарор ривожланиш мақсадларига эришишда олий таълим муассасаларининг ролини ошириш бўйича тавсиялар ишлаб чиқилди.

Тадбир якуни бўйича конференция тезислари тўпламини нашр қилиш режалаштирилган.