Ўзбекистон Республикаси Конституциясининг 28 йиллигига бағишланган тадбир

2020 йил 7 декабрь куни Бош прокуратура Академиясида Ўзбекистон Республикаси Конституцияси қабул қилинганлигининг 28 йиллигига бағишланган тантанали тадбир бўлиб ўтди.

Тадбирда Бош прокурор ўринбосари Э.Юлдашев, Конституциявий суд раиси ўринбосари А.Ғафуров, Бош прокуратура ходимлари, Бош прокуратура Академияси раҳбарияти ва ходимлари иштирок этдилар.

Тадбирда сўзга чиққан маърузачилар мустақиллигимизнинг илк даврида қабул қилинган Конституциямизнинг мустақил демократик ҳуқуқий давлатни шакллантириш ва ривожлантиришнинг асосий омили сифатидаги аҳамиятини таъкидлаб ўтдилар. Конституция миллий давлатчиликни, янги сиёсий ва ижтимоий тизимни яратиш учун ҳуқуқий асос сифатида янгиланиш жараёнининг ёрқин намунаси бўлди.

Ўзбекистон Республикаси Конституцияси қабул қилинган кундан ўтган 28 йил ичида унинг норма ва қоидалари изчил амалга оширилиб бориб, фуқаролик ва миллатлараро тотувликни таъминлаш, турмуш даражасини изчил ошириш, ижтимоий-иқтисодий ривожланиш, фан ва таълим соҳаларида юқори даражаларга эришишга хизмат қилмоқда.

Конституция ва қонунлар устуворлигини таъминлаш – давлат ҳокимияти органлари томонидан қабул қилинаётган ҳужжатлар, барча даражадаги мансабдор шахсларнинг хатти-ҳаракатлари Конституция ва қонунларга қатъий ва сўзсиз мувофиқлиги ҳуқуқий демократик давлатнинг энг муҳим мезонидир.

Тадбир давомида Академия томонидан тайёрланган Ўзбекистон Республикаси Конституцияси қабул қилинган кунга бағишланган видеоролик намойиш этилди.

Иштирокчилар томонидан тадбир якунида аҳолининг ҳуқуқий саводхонлигини ошириш, фуқаролар ҳуқуқ ва эркинликларини ҳимоя қилиш мақсадида Конституция нормалари моҳиятини кенг ёритиш ва тарғиб қилишнинг муҳимлиги алоҳида таъкидлаб ўтилди.