Иқтисодий жиноятларга қарши курашиш департаменти ходимлари учун масофавий малака ошириш курси бошланди

Бош прокуратура Академиясида Иқтисодий жиноятларга қарши курашиш департаментининг тезкор ходимлари ҳамда ишга янги қабул қилинган ходимлари учун навбатдаги малака ошириш курси бошланди.

Ўқув курси дастури жиноий схемалар ва коррупцион қилмишларни аниқлашда тизимли таҳлил, суриштирув ва тезкор-қидирув фаолиятини амалга ошириш, жиноий фаолиятдан олинган даромадларни легаллаштириш, бюджет маблағларини талон-торож қилиш, солиқ ва валюта соҳасидаги жиноятларга қарши курашишни ташкил этиш масалаларини қамраб олган.

Курс давомида тингловчиларнинг шахсий ва ишчанлик сифатларини янада ошириш мақсадида вақтни унумли бошқариш, жамоада ижобий муҳитни ва психологик барқарорликни таъминлаш, низоларнинг олдини олиш ва мулоқот психологияси бўйича машғулотлар назарда тутилган.

Курсни ўтказишни лозим даражада ташкил этиш мақсадида тингловчиларга ишдан ажралмаган ҳолда курсни ўташ тартиби, амалий топшириқларни бажариш қоидалари таништирилиб, уларнинг Академия профессор-ўқитувчилари билан доимий алоқада бўлиш имкониятларини таъминлаш чоралари кўрилди.