Криминалистика ва суд экспертизаси соҳасида малака ошириш

Бош прокуратура Академиясида 2020 йилнинг 17 ноябрида Қорақалпоғистон Республикаси, вилоятлар ҳамда Тошкент шаҳар, Ҳарбий ва Транспорт прокуратуралари прокурор-криминалистлари учун ташкил этилган “Криминалистика ва суд экспертизаси” мавзусидаги масофавий малака ошириш курси ниҳоясига етди.

Курс дастури криминалистик техника, суд фотографияси ва видео тасвир ёзуви, криминалистик трасология ва баллистика, ҳужжатлар қўлёзма матнларини криминалистик усулда текшириш, ҳужжатларни криминалистик техник усулда текшириш каби мавзуларни қамраб олган.

Ўқув машғулотлари давомида шунингдек одамларни ташқи қиёфа белгилари асосида идентификация қилиш, криминалистик тактика ва терговни режалаштириш, экспертиза тергов ҳаракати, экспертиза текшируви учун намуналар олиш ва бошқа бир қатор муҳим масалалар бўйича тингловчилар билим ва кўникмаларини оширишга эътибор қаратилди.

Масофавий малака ошириш курси доирасида “Криминалистика ва суд экспертизаси” мавзусида синхрон режимда ўқув машғулоти ташкил этилиб, амалиётда юзага келадиган муаммолар ва уларнинг ечимлари муҳокама қилинди.