Активларга бенефициар эгалик қилиш мавзусида халқаро ўқув тренинги

Бош прокуратура Академияси Ғарбий ва Марказий Осиё давлатларининг активларни қайтариш бўйича идоралараро тармоғи  (ARIN-WCA) Котибияти вазифасини амалга ошириши доирасида БМТнинг Гиёҳвандлик ва жиноятчилик бўйича бошқармаси билан ҳамкорликда  2020 йилнинг 14-16 декабрь кунлари мазкур тармоқ аъзо давлатлар алоқа вакиллари учун “Активларга бенефициар эгалик қилиш” мавзусида базавий ўқув тренинги ташкиллаштирди.

Мазкур тренинг онлайн шаклда, тармоққа аъзо ҳамда кузатувчи бўлган – Афғонистон, Озарбайжон, Покистон, Тожикистон, Туркманистон, Украина, Ўзбекистон, Қозоғистон, Қирғизистон ва Эрон давлатларининг 20 дан ортиқ вакиллари иштирокида ўтказилди.

Буюк Британия ҳамда Гернси давлатларидан бўлган хорижий экспертлар тренинг иштирокчиларига активларга бенефициар эгалик қилиш асослари, мулкларнинг ҳақиқий эгаларини яширишнинг замонавий тенденциялари ва ёндашувлари, шунингдек активларни қайтариш ва айбдорларни жавобгарликка тортиш мақсадида бенефициар мулкдорларни аниқлаш механизмлари юзасидан ўз тақдимотларини амалга оширишди.

Тренинг давомида виртуал гуруҳларда амалий машғулотларни ва вазифаларни бажариш амалиёти қўлланилганлиги иштирокчиларга ушбу соҳада тажриба алмашиш имкониятини яратди ҳамда мазкур курснинг натижадорлигини оширишга хизмат қилди.

Ўқув тренинги якуни бўйича иштирокчилар электрон сертификтлар билан тақдирландилар. Ўқув тренингининг кейинги босқичида ушбу мавзуда мукаммал ўқув курсини ишлаб чиқиш ва ўтказиш режалаштирилган.