“Тошкент ёшлар форуми – 2020”да иштирок этилди

Шу йилнинг 18-19 декабрь кунлари Бош прокуратура Академияси магистратураси тингловчилари Тошкент шаҳридаги “Congress Hall” биносида бўлиб ўтган ёшлар форумида иштирок этдилар.

Форум ёш авлоднинг интеллектуал ва ижодий салоҳиятини ривожлантириш, илмий ва ижодий ҳамкорлик муҳитини яратиш, ислоҳотларнинг амалга оширилишига ишонч ва янги марраларни забт этиш учун илҳом бериш мақсадида ташкил этилди.

Форумнинг бой дастурига “Ҳуқуқий Тошкент – 2030”, “Молия сектори ва пойтахтнинг замонавий қиёфаси – 2030”, “Рақамли Тошкент – 2030” ва бошқа тадбирлар киритилган.

Форумнинг биринчи кунида Академия тингловчилари “Ҳуқуқий Тошкент – 2030” семинарида қатнашиб, унда – адлия вазири Р.Давлетов ва Коррупцияга қарши курашиш агентлиги директори А.Бурхановлар маъруза қилдилар. Тадбир интерактив усулда олиб борилиб, тингловчилар ўзларини қизиқтирган саволларга жавоб олдилар.

Форумнинг иккинчи кунида тингловчилар Ўзбекистон Республикаси Президенти ҳузуридаги Давлат хизматини ривожлантириш агентлиги директорининг биринчи ўринбосари О.Хасановнинг давлат хизматини ривожлантиришга бағишланган семинарида, шунингдек Ўзбекистон Миллий ахборот агентлиги бош директори ўринбосари Х.Худойбердиевнинг блогерлар билан очиқ мулоқот семинарида иштирок этиш имконига эга бўлдилар.

Академия тингловчилари келгусидаги ёшларнинг фаол иштирокини талаб қиладиган лойиҳалар тўғрисида уларнинг умумий хабардорлигини ошириш, ёшлар ўртасида амалий кўникма ва малакаларни ривожлантириш, ўзаро ишончни ошириш, ташаббускорлик ва ғайратни шакллантириш учун бундай тадбирларни ўтказиш муҳимлигини таъкидладилар.