Мажбурий ижро бюроси давлат ижрочилари иштирокидаги малака ошириш курси бошланди

Ўзбекистон Республикаси Президентининг “Суд ҳужжатлари ва бошқа органлар ҳужжатларини ижро этиш тизимини янада такомиллаштириш чора-тадбирлари тўғрисида”ги ПФ–6118-сонли Фармон талаблари ижросини таъминлаш мақсадида 2021 йилнинг 12 январидан бошлаб Бош прокуратура Академияси томонидан Мажбурий ижро бюросининг давлат ижрочилари учун “Ижро ҳужжатларини ижро этишда қонунийликни таъминлаш масалалари” мавзусида масофавий малака ошириш курси бошланди.

Ушбу курс махсус дастур асосида ташкил этилган бўлиб, давлат ижрочиларининг ижрога келиб тушган барча турдаги ижро ҳужжатларини ижро этиш,  сифатли процессуал ҳужжатларни тайёрлаш, хизматдаги конфликтларни бартараф этиш, Бюро органларида фойдаланиладиган ахборот тизимлари ва дастурий комплекслар билан ишлашга доир профессионал кўникмаларини мустаҳкамлашга қаратилган.

 Курс дастурида шунингдек давлат ижрочилари томонидан касб одобномаси қоидаларига риоя қилиш ҳамда психология ва вақтни бошқариш (тайм-менежмент) борасидаги кўникмаларини такомиллаштириш масалалари назарда тутилган.

Ўқув курси якуни бўйича синов имтиҳонлари ўтказиш ва тингловчиларга малака оширганлик тўғрисида сертификатлар топшириш режалаштирилган.