Қийноқларни тергов қилиш борасида халқаро тренинг

Бош прокуратура Академияси, Инсон ҳуқуқлари бўйича Ўзбекистон Республикаси Миллий маркази, Европада хавфсизлик ва ҳамкорлик ташкилотининг Ўзбекистондаги лойиҳалар координатори, БМТнинг Инсон ҳуқуқлари бўйича Олий комиссари бошқармасининг Марказий Осиё учун минтақавий бўлинмаси билан ҳамкорликда “Истамбул протоколига мувофиқ қийноқлар ва бошқа шафқатсиз муносабатларни самарали тергов қилиш ва ҳужжатлаштириш” мавзусида халқаро онлайн тренинг бўлиб ўтди.

Уч кун давом этган мазкур халқаро тренингда Бош прокуратура ва Инсон ҳуқуқлари бўйича Ўзбекистон Республикаси Миллий маркази ходимлари, Бош прокуратура Академияси профессор-ўқитувчилари, адвокатлар ҳамда халқаро экспертлар иштирок этди.  

Тренингда “Dignity” номли Даниянинг қийноқларга қарши институти ҳамда БМТнинг Инсон ҳуқуқлари бўйича Олий комиссари бошқармасининг Марказий Осиё учун минтақавий бўлинмаси экспертлари томонидан маърузалар ўтилди.

Халқаро экспертлар тадбир иштирокчилари билан Истамбул протоколи мазмуни, тарихи, суд-тиббий ҳужжатлаштириш, қийноқларнинг жисмоний оқибатлари, жабрланувчини сўроқ қилиш тартиби, қийноқдан жабрланганларни реабилитация қилиш принциплари асослари бўйича ўз тажрибалари ҳақида маълумот бердилар.

Иштирокчилар халқаро ҳуқуқда қийноқларнинг тақиқланишига оид қонунчилик ҳамда ушбу йўналишдаги халқаро стандартларни имплементация қилиниши борасида фикр алмашдилар.

Бундай тадбирларни мунтазам ўтказилиши ходимларнинг инсон ҳуқуқларини ҳимоя қилишга оид халқаро стандартлар ҳамда хорижий мамлакатларнинг ижобий тажрибаси бўйича билим ва касбий малакасини оширишда муҳим аҳамият касб этиши иштирокчилар томонидан алоҳида қайд этилди.