Академия илмий салоҳиятини юксалтириш

Ўзбекистон Республикаси Бош прокуратураси Академияси бўлим катта прокурори А.Одинаевнинг “12.00.03 Фуқаролик ҳуқуқи. Тадбиркорлик ҳуқуқи. Оила ҳуқуқи. Халқаро хусусий ҳуқуқ” ихтисослиги бўйича “Мажбурият ҳуқуқи соҳасида неустойка қўллашни тартибга солиш” мавзусидаги юридик фанлар бўйича фалсафа доктори (PhD) илмий даражасини олиш учун ёзилган диссертацияси ҳимояси бўлиб ўтди.

А.Одинаев томонидан фуқаролик ҳуқуқи институти сифатида неустойканинг юридик таърифи, мажбуриятлар ижросини таъминлаш ва фуқаролик-ҳуқуқий жавобгарликда неустойканинг ўрни ва роли, мажбурият-ҳуқуқий муносабатларда неустойка қўллашни такомиллаштириш масалаларини таҳлил қилиш натижасида мажбурият ҳуқуқи соҳасида неустойка қўллашни тартибга солиш ва неустойка институтининг ҳуқуқий асосларини такомиллаштиришга қаратилган таклиф, тавсия ва хулосалар ишлаб чиқилди.

Илмий Кенгаш иштирокчилари томонидан мазкур илмий иш бир овоздан ижобий деб баҳоланиб, юридик фанлари бўйича фалсафа доктори (PhD) илмий даражасини бериш юзасидан Вазирлар Маҳкамаси ҳузуридаги Олий аттестация комиссиясига ҳужжатларни тақдим этиш юзасидан қарор қабул қилинди.

Академия жамоаси А.Одинаевни диссертацияни муваффақиятли ҳимоя қилганлиги билан табриклайди ва келгусидаги илмий ва касбий фаолиятида улкан зафарлар тилайди.