Экология ва атроф-муҳитни муҳофаза қилиш соҳасида прокурор назоратини ташкил этишга оид малака ошириш курси бошланди

Бош прокуратура Академиясида Тошкент табиатни муҳофаза қилиш ва Орол табиатни муҳофаза қилиш прокуратуралари, Қорақалпоғистон Республикасининг Мўйноқ туманини ривожлантиришга оид қонунчилик ижроси устидан назорат ва Айдар-Арнасой кўллар тизимини ривожлантириш соҳасида қонунчилик ижроси устидан назорат бошқармалари ходимлари иштирокида “Экология ва атроф-муҳитни муҳофаза қилишга оид қонун ҳужжатлари ижроси устидан прокурор назорати” мавзусида масофавий малака ошириш курси бошланди.

Тингловчилар эҳтиёжлари асосида тузилган малака ошириш курси дастурида экология ва атроф-муҳитни муҳофаза қилишга оид қонунчилик ижроси устидан прокурор назоратини амалий ташкил этишнинг долзарб масалалари бўйича машғулотлар назарда тутилган. Курс материаллари атроф-муҳитни муҳофаза қилиш ва табиий ресурслардан оқилона фойдаланиш соҳасидаги қонун ҳужжатлари талаблари бузилишининг олдини олиш, уни аниқлаш ва унга чек қўйиш борасида тингловчиларнинг касбий малака ва компетенцияларини ривожлантиришга қаратилган.

Ўқув курси якунида тингловчилар томонидан амалдаги қонунчиликка киритилган янгиликлар, амалиётда мавжуд тизимли муаммолар ва камчиликлар, уларни ҳал этиш йўллари ҳамда бошқа муҳим аҳамиятга молик масалалар бўйича таҳлилий материаллар тайёрланади.

Мазкур малака ошириш курси тингловчилар асосий иш жойидан ажралмаган ҳолда тўлиқ масофадан амалга оширилади.

Ўқув тадбирлари бошланишига тайёргарлик кўриш доирасида тингловчилар учун масофавий курсни ўташ ва амалий топшириқларни бажариш тартибини тушунтириш, шунингдек бошқа ташкилий масалалар муҳокамасига бағишланган аудиоконференцалоқа режимида семинар ташкил этилди.