Академия фаолиятининг ҳолати ва истиқболлари муҳокамаси

Бош прокуратура Академиясида 2020 йилдаги фаолият натижалари, шунингдек таълим, илмий ва таҳлилий соҳалардаги фаолиятни янада такомиллаштириш бўйича стратегик мақсад ҳамда вазифалар муҳокамасига бағишланган янги таркибдаги Академия Кенгашининг биринчи йиғилиши бўлиб ўтди.

Тадбирда Академиянинг ўтган йилдаги фаолиятининг асосий кўрсаткичлари танқидий таҳлил асосида кўриб чиқилиб, кадрлар тайёрлаш, қайта тайёрлаш ва малакасини ошириш таълим дастурларини Академиянинг электрон платформаси негизида тўлиқ масофавий шаклда ташкил этилганлиги йилнинг ўзига хос жиҳати сифатида таъкидлаб ўтилди.

Прокуратура органларини илмий-методик ва психологик жиҳатдан таъминлаш ҳамда илмий кадрларни тайёрлаш масалаларига алоҳида эътибор қаратилди. Хусусан, мустақил изланувчилар, шу жумладан Академия ходимлари илмий фаолиятининг 2020 йил якуни бўйича мониторинги натижалари кўриб чиқилиб, унинг натижалари асосида тегишли номзодлар илмий унвонга тавсия этилди.

Йиғилишда ўқув-услубий ва илмий-амалий тадбирларни, маҳаллий ва хорижий таълим, илмий-тадқиқот муассасалари ва бошқа ташкилотлар билан ҳамкорликни, Ўзбекистон Республикаси Инновацион ривожланиш вазирлигининг инновацион лойиҳаларини амалга ошириш каби ишлар юзасидан маълумотлар эшитилди.

Шунингдек, Кенгашда “Ўзбекистон Республикаси Бош прокуратураси Академияси магистратурасида ўқув жараёнини ташкил этиш тартиби тўғрисида”ги Низомга ўзгартириш ва қўшимчалар киритиш, “Мамлакатимизда миграция соҳасидаги давлат бошқарувининг долзарб масалалари” мавзусидаги халқаро илмий-амалий онлайн конференция материаллари тўпламини чоп этишга тавсия этиш масалалари муҳокама қилинди.

Кун тартибидаги масалалар бўйича тегишли қарорлар қабул қилинди.