Қуйи прокуратура ходимлари учун малака ошириш курси бошланди

Бош прокуратура Академиясида туман (шаҳар) прокурорларининг ва уларга тенглаштирилган прокурорларнинг ёрдамчилари иштирокида “Судларда вояга етмаганларнинг жиноятлари ҳақидаги ишларни юритишда прокурор иштирокининг ўзига хос хусусиятлари” мавзусида навбатдаги малака ошириш курси бошланди.

Курс дастури прокурорнинг вояга етмаганлар иштирокидаги жиноят ишлари бўйича дастлабки тергов ва судда қўйилган талаблар, уларга нисбатан жазо турлари ва уларнинг қўлланиш тартиби, жиноий жавобгарликдан озод қилиш асослари каби масалаларни қамраб олган.

Ўқув курси машғулотлари доирасида шунингдек, қуйи турувчи прокурорларнинг судларда жиноят ишлари кўрилишида прокурор ваколатини таъминлаш йўналиши бўйича фаолиятини баҳолашда эътибор берилиши керак бўлган масалалар, суд ҳукмининг қонунийлиги, асослилиги ва адолатлилигини текширишда прокурорнинг роли, вояга етмаганларга нисбатан жиноят учун жазо тайинлашнинг ўзига хос хусусиятлари, бундай ишларнинг кўрилишида прокурорнинг процессуал ҳуқуқ ва мажбуриятларига оид машғулотлар ўрин олган.  

Мазкур малака ошириш курси тингловчиларда судларда прокурор ваколатини таъминлаш ва суд қарорларини қонунийлиги, асослилиги ва адолатлилигини текшириш ҳақида назарий билимлар тизимини ҳамда улардан фойдаланишга оид амалий кўникмаларни ривожлантиришга қаратилган.