Диссертация тадқиқотини амалга ошириш масалалари юзасидан илмий семинар бўлиб ўтди

2021 йил 10 март куни Бош прокуратура Академиясида “Диссертация иши режасини тайёрлаш ва унга қўйилган талаблар” мавзусида илмий семинар ўтказилди.

Семинарда Бош прокуратура Академияси ва Судьялар олий кенгаши ҳузуридаги Судьялар олий мактабининг докторантлари, мустақил изланувчилари ва магистратура тингловчилари иштирок этди. Семинарда Академия бошлиғи ўринбосари, ю.ф.д., проф. М.Мамасиддиқов ва Академия профессори Э.Хожиев маъруза қилди.

Илмий семинар очиқ мулоқот ва савол-жавоб тарзида олиб борилди. Академия ва Судьялар олий мактабининг докторант ва мустақил изланувчилари томонидан диссертация ишининг таркибий қисмларига, диссертацияда фойдаланиладиган статистик ва бошқа маълумотларга ҳамда хорижий журналларда чоп этиладиган мақолаларга қўйиладиган талаблар, диссертациялар илмий натижаларининг амалиётга жорий этилганлигини тасдиқловчи ҳужжатларни олиш тартиби тўғрисида саволлар берилди.

Академия профессор-ўқитувчилари томонидан диссертация режасини илмий тадқиқотнинг вазифаларидан келиб чиққан ҳолда шакллантириш лозимлиги, диссертацияда фойдаланиладиган статистик ва бошқа маълумотлар аниқ манбалардан олинган бўлиши ва диссертация натижаларини асослаш мақсадини назарда тутиши, юридик фанлар бўйича хорижий мамлакатлар илмий журналлари импакт-факторининг даражаси ОАК Раёсати қарори билан белгиланиши, республика, иқтисодиёт тармоқлари ва ҳудуд даражасидаги давлат мақсадли дастурида ёки норматив-ҳуқуқий ҳужжатларни ишлаб чиқиш ва тайёрлашда фойдаланилган таклифлар илмий натижаларининг амалиётга жорий этилганлигини тасдиқлаши ҳақида батафсил маълумотлар берилди.

Тадбир баҳс-мунозараларга бой тарзда ўтди. Иштирокчилар бу каби тадбирларнинг илмий тадқиқот фаолиятини ривожлантиришдаги амалий аҳамияти ва самарасини таъкидлаб, навбатдаги илмий семинарларда ҳамкор идоралар ва таълим муассасаларининг тадқиқотчилари иштирокида олиб борилишини қўллаб-қувватладилар.