Жиноий даромадларни легаллаштириш ва терроризмни молиялаштиришга қарши кураш масалалари бўйича тренинглар туркуми ташкил этилди

Академия томонидан БМТнинг Гиёҳвандлик ва жиноятчиликка қарши курашиш бўйича бошқармасининг (БМТ ГЖБ) Марказий Осиёдаги минтақавий ваколатхонаси ва Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти билан ҳамкорликда АҚШнинг Ўзбекистондаги элчихонаси кўмагида жиноий даромадларни легаллаштириш ва терроризмни молиялаштиришга қарши кураш соҳасида семинар-тренинглар туркуми ташкил этилди.

Жумладан, “Уюшган жиноятчилик ва гиёҳванд моддаларнинг ноқонуний муомаласи билан боғлиқ параллел молиявий текширувларни амалга ошириш ва ноқонуний молиявий оқимларга чек қўйиш бўйича Ўзбекистон Республикасининг ваколатли органлари салоҳиятини  ошириш” лойиҳаси доирасида тадбир ташкил этилди.

Уюшган жиноятчилик ва гиёҳванд моддаларнинг ноқонуний муомаласи билан боғлиқ параллел молиявий текширувларни амалга ошириш ва ноқонуний молиявий оқимларга чек қўйиш бўйича Ўзбекистон Республикасининг ваколатли органлари салоҳиятини  оширишга қаратилган амалий симуляцион тренинг учун жиноят иши макетини ва ушбу семинарнинг ўтказиш жараёнида бевосита иштирок этадиган миллий экспертлар гуруҳини шакллантириш мақсадида жорий йилнинг 24-26 февраль кунлари Бош прокуратура Академиясида семинар-тренинг ташкил этилди.

Бундан ташқари, жорий йилнинг 1-3 март кунлари терроризмни молиялаштиришга қарши курашиш борасида ваколатли органлар ходимларининг малакасини ошириш мақсадида “Терроризмни молиялаштиришга қарши курашиш – тергов асослари” мавзусида симуляцион тренинг ташкил этилди.

Тадбирлар туркумини ўтказишда БМТ ГЖБ эксперти А. Романовский, Марказий Осиёнинг минтақавий ахборот мувофиқлаштирувчи маркази халқаро ташкилотининг ахборот-таҳлил тармоғи ходими Т. Евдокимова ва Россия молиявий мониторинг бўйича Федерал хизмати масъул ходими М. Колинченко халқаро экспертлар сифатида жалб қилинди.

Тадбирлар жиноий даромадларни легаллаштириш ва терроризмни молиялаштиришга қарши курашиш соҳасида ваколатли органлар ўртасидаги ҳамкорликни кучайтиришга хизмат қилиб, мазкур соҳада мамлакатнинг салоҳиятини ошириш учун қўйилган қадамлардан биридир.