Академия магистратураси тингловчилари Киото Конгресси ёшлар форумида иштирок этдилар

Тобора кенгайтириб борилаётган халқаро ҳамкорлик доирасида Бош прокуратура Академияси магистратураси тингловчилари БМТнинг жиноятчиликнинг олдини олиш дастури доирасида ўтказилган Киото Конгресси Ёшлар Форумида онлайн тарзда муваффаққиятли иштирок этдилар.

Форум уч йўналишда – жиноятчиликнинг олдини олишда ёшлар иштироки, қонунга итоаткорлик маданиятини шакллантиришда ёшлар тарбияси ҳамда хавфсиз ахборот жамиятини таъминлашда ёшларнинг ўрни мавзулари бўйича сессиялар шаклида ўтказилди.

Академия тингловчилари дунёнинг турли мамлакатларидан қатнашган 150 нафардан ортиқ ёшлар қаторида жиноятчиликнинг олдини олишда ёшлар иштироки сессиясида қизғин муҳокамаларда фаол иштирок этдилар.

Хусусан, сессия давомида жиноятчиликнинг олдини олиш ва ҳуқуқбузарликларнинг профилактикаси борасида ёшларнинг ролига оид турли давлатлар тажрибаси билан яқиндан танишиб, бу борада ўз фикр-мулоҳазаларини билдириб ўтдилар.

Форум якуни бўйича ялпи мажлис томонидан умумлаштирилган тавсия ва хулосалар қабул қилинди.

Академия магистратураси тингловчиларининг ушбу тадбирдаги иштироки долзарб мавзу бўйича дунёнинг турли мамлакатларидан қатнашган тенгқурлари билан фикр алмашиш, илғор давлатларнинг қонунчилиги ва тажрибаси ҳамда халқаро стандартлар билан яқиндан танишиш имконини берди.

Форум якунида магистратура тингловчилари Япония Адлия вазирининг тегишли сертификатлари билан тақдирландилар.