Етказилган зарарни ундиришга оид суд амалиётидаги муаммолар муҳокама қилинди

Бош прокуратура Академиясида Германия Халқаро ҳамкорлик ташкилотининг (GIZ) “Марказий Осиёда ҳуқуқий давлатчиликка кўмаклашиш” минтақавий дастурининг Ўзбекистондаги вакили билан ҳамкорликда “Давлат ва жамоат эҳтиёжлари учун ер участкаларининг олиб қўйилиши муносабати билан мулкдорларга етказилган зарарни ундиришга оид суд амалиётидаги муаммолар” мавзусига бағишланган республика онлайн семинар-тренинги ўтказилди.

Тадбирда Бош прокуратуранинг тегишли бошқармалари, Ўзбекистон Республикаси Олий суди, Судьялар олий кенгаши ҳузуридаги Судьялар олий мактаби, Ўзбекистон адвокатлар Палатаси вакиллари ҳамда вилоят прокуратуралари ва уларга тенглаштирилган прокуратураларнинг масъул ходимлари иштирок этдилар.

Халқаро эксперт – Германиянинг Ольденбург шаҳри биринчи инстанция судининг раиси Хорст Фрелс тадбирда маъруза қилди.

Семинар-тренинг давомида давлат ва жамоат эҳтиёжлари учун ер участкаларининг олиб қўйилиши муносабати билан мулкдорларга етказилган зарарни ундиришга оид суд амалиёти ва ушбу тоифадаги ишларнинг ҳал этилишида учраётган тизимли муаммолар юзасидан муҳокамалар бўлиб ўтди.

Семинар давомида мазкур тоифадаги ишларнинг ҳал этилишида хусусий мулк эгаларининг ҳуқуқлари ва манфаатлари қонунда белгиланган тартибда ҳимоя қилинишига алоҳида эътибор қаратилиб, қонунчиликда бу борада белгиланган тартиб-таомиллар бўйича тегишли тушунтиришлар берилди.