“Ёшлар ижтимоий уйғунлик учун” қўшма лойиҳасини амалга ошириш доирасида халқаро экспертлар иштирокида учрашув бўлиб ўтди

“Фарғона водийсида ёшлар ижтимоий уйғунлик учун” қўшма лойиҳасини амалга ошириш доирасида Бош прокуратура Академияси вакиллари ва БМТнинг гиёҳванд моддалар ва жиноятчилик бўйича бошқармаси билан халқаро экспертлар ўртасида учрашув бўлиб ўтди.

Учрашув давомида томонлар ҳуқуқбузарликлар профилактикаси билан боғлиқ фаолият билан шуғулланувчи ҳуқуқни муҳофаза қилувчи органлар, фуқароларнинг ўзини-ўзи бошқариш органлари ва жамоатчилик ўртасида ходимларнинг профессионал даражасини кучайтириш бўйича мустаҳкам ва самарали ҳамкорлик ўрнатиш истагини билдирдилар.

Хорижий экспертлар Сергей Сидоров ва Тинатин Бежанашвили ўзларининг бошқа хорижий мамлакатлардаги иш тажрибалари билан таништирдилар. Улар томонидан хавфсизлик умумий даражасини кўтариш ва ҳудудларда қулай муҳитда яшаш юзасидан қатор таклифлар илгари сурилди, Фарғона водийсининг ўзига хос хусусиятларини инобатга олган ҳолда ҳуқуқбузарликларнинг барвақт олдини олиш масалаларига алоҳида эътибор қаратилди.

Учрашув конструктив руҳда ўтди, келгусида лойиҳани амалга ошириш бўйича навбатдаги вазифалар белгилаб олинди.