Бош прокуратура Академияси раҳбариятининг Беларусь Республикасига хизмат сафари бўлиб ўтди

Бош прокуратура Академияси бошлиғи Е.В.Коленко Ўзбекистон Республикаси ҳуқуқни муҳофаза қилиш идораларининг таълим муассасалари раҳбарларидан иборат Ўзбекистон Республикаси делегацияси таркибида Беларусь Республикасига хизмат сафарида бўлди.

Делегация аъзолари Беларусь Республикаси Ички ишлар вазирлиги академиясига ташриф буюриб, Академия бошлиғи С.И.Дорошко билан учрашувда замонавий талабларга мос ҳолда ҳуқуқни муҳофаза қилиш соҳаси малакали кадрларини тайёрлаш тизимини ривожлантириш, таълим сифатини ошириш ва илмий-тадқиқот фаолиятини кенгайтириш борасида ҳамкорлик алоқаларини ўрнатиш ва кенгайтириш масалаларини муҳокама қилдилар.

Ташриф давомида шунингдек Беларусь Республикаси Тергов қўмитасида Бош прокуратура Академияси раҳбари Тергов қўмитаси раиси Дмитрий Гора билан учрашди.

Тадбирда Тергов қўмитаси марказий аппарати халқаро-ҳуқуқий бўлими бошлиғи М.Вавуло, Тергов қўмитаси институти бошлиғи Ю.Каменецкий ҳамда идоравий таълим муассасасининг илмий, халқаро ва ноширлик фаолиятини ташкил этиш бўлими бошлиғи Г.Суздалева иштирок этдилар.

Конструктив руҳдаги, амалий йўналтирилган музокаралар давомида томонлар янада самарали ҳамкорликка қатъий ишонч билдирдилар.

Томонлар илмий-тадқиқот ва таълим соҳаларида, шу жумладан халқаро лойиҳаларни биргаликда амалга ошириш борасида ҳамкорликни ривожлантириш истиқболларини муҳокама қилдилар.

Ходимларнинг шахсий ва касбий компетенцияларини мониторинг қилиш тизими белоруссиялик ҳамкорларда катта қизиқиш уйғотгани боис, Бош прокуратура Aкадемияси Тергов қўмитаси институти фаолиятига бундай тизимни жорий этишда услубий ёрдам кўрсатишга тайёр эканлиги билдирилди.

Томонлар яқин келажакда имзоланиши режалаштирилган таълим ва илмий-тадқиқот фаолияти соҳасидаги ҳамкорлик тўғрисидаги битим лойиҳасини кўриб чиқдилар.

Ташриф давомида, шунингдек Aкадемия ва Беларусь давлат университетининг судьялар, прокуратура, судлар ва адлия муассалари ходимларини қайта тайёрлаш ва малакасини ошириш институти билан ҳамда Беларусь Республикаси Бош прокуратураси қонунийлик ва ҳуқуқ-тартиботни мустаҳкамлаш илмий-амалий маркази билан таълим ва илмий-тадқиқот фаолияти соҳасидаги ҳамкорлик тўғрисида 2018 йилда имзоланган Меморандумлар доирасида Институт директори В.Годунов ҳамда Марказ директори В.Марчук билан учрашув бўлиб ўтди.

Таълим муассасалари раҳбарлари юридик кадрларни тайёрлаш, қайта тайёрлаш ва малакасини ошириш тизимини янада такомиллаштириш бўйича ўзаро манфаатли ҳамкорликни кенгайтиришнинг устувор йўналишларини муҳокама қилдилар.

Хизмат сафари якунлари бўйича Aкадемия билан Беларусь Республикасининг таълим муассасалари ўртасидаги ҳамкорликни янада мустаҳкамлаш бўйича аниқ чора-тадбирлар белгилаб олинди.