Академия ёш олимлари иштирокида илмий семинар бўлиб ўтди

Бош прокуратура Академиясида илмий-тадқиқот салоҳиятини юксалтириш, тадқиқот кўникмаларини ривожлантириш ва тадқиқот фаолиятини кенгайтириш мақсадида “Фан соати” рукнида юридик фан ва ҳуқуқни қўллаш амалиётининг долзарб муаммолари муҳокамасига бағишланган илмий семинарлар тизимли равишда ўтказиб келинмоқда.

Навбатдаги илмий семинар Бош прокуратура Академияси, ИИВ Академияси, Судьялар олий мактаби, ТДЮУ ва ДБА докторант ва мустақил изланувчилари иштирокида бўлиб ўтди.

Мазкур семинарнинг ўзига хос жиҳати унда модератор ва маърузачилар сифатида ёш олимлар – Академия докторантлари иштирок этиб, ўз илмий-тадқиқот мавзулари юзасидан маъруза қилдилар. Хусусан, А.Давронов, А.Джураева, Ш.Саидов ва Д.Ибрагимовлар ахборот технологиялари соҳасидаги жиноятларни тергов қилиш устидан прокурор назоратини такомиллаштириш, назоратсизлик ва вояга етмаганлар ҳуқуқбузарликларининг олдини олиш соҳасидаги идоралараро фаолият ва прокуратуранинг роли, прокуратура органларининг ҳуқуқ ижодкорлиги фаолиятини такомиллаштириш истиқболлари ҳамда вояга етмаганлар ҳуқуқларини ҳимоя қилиш борасидаги қонунчилик ижроси устидан прокурор назоратини рақамлаштириш истиқболлари масалалари юзасидан тақдимот қилдилар.

Ушбу илмий семинар ёш олимлар учун юриспруденция соҳасидаги долзарб мавзуларда илмий тадқиқот ўтказиш методлари ва уларни қўллаш юзасидан ўзаро тажриба алмашиш учун муҳим илмий майдон вазифасини бажарди ва баҳс-мунозараларга бой тарзда ўтди.