Швециянинг Лунд университети билан ҳамкорлик кенгаймоқда

Бош прокуратура Академияси ҳамда етакчи хорижий таълим ва илмий-тадқиқот муассасалари ўртасидаги халқаро ҳамкорлик тобора кенгайиб ва мустаҳкамланиб бормоқда.

Ушбу фаолият доирасида Академия Швециянинг Лунд университети билан биргаликда магистратура мутахассисликлари бўйича ўқитиш самарадорлигини ошириш ва магистратура тингловчилари алмашинувини ташкил этиш мақсадида ўзаро тажриба алмашишга қаратилган Erasmus+ халқаро кредит мобиллик дастурини амалга оширмоқда.

Шунга кўра, жорий ўқув йилида Академиянинг икки нафар магистратура тингловчиси Лунд университетининг ҳуқуқ социологияси департаментида иккинчи семестр дастури доирасида таҳсил олмоқда.

Магистратура дастурини ўташ билан бир қаторда, Академия тингловчилари магистрлик диссертациялари бўйича тадқиқот ишлари доирасида коррупцияга қарши курашиш борасида Европанинг энг ривожланган мамлакатлари тажрибаларини ўрганмоқдалар, шунингдек дунёнинг 30 дан ортиқ мамлакатидан бўлган талабалар ва тадқиқотчилар билан фикр алмашмоқдалар.

Бундан ташқари, Академия Лунд университети томонидан мувофиқлаштирилаётган Европа Комиссиясининг “Central Asian Law: Legal Cultures and Business Environments in Central Asia” лойиҳасига жалб этилган бўлиб, ушбу консорциумга Цюрих университети, Прагадаги Карлов университети, Ригадаги ҳуқуқ олий мактаби, Мармара Университети, Латвия университети ва бошқа таълим муассасалари киради.

Лойиҳа доирасида Академиянинг икки нафар ходими лойиҳага жалб қилинган бошқа олимлар қатори ҳозирги кунда университет профессор-ўқитувчилари раҳбарлигида Лунд университетида илмий-тадқиқот ишларини олиб бормоқдалар.

Ушбу халқаро ҳамкорлик амалиёти Академиянинг ўқув ва илмий-тадқиқот фаолиятига инновацион технологиялар ва усулларни жорий этишга самарали хизмат қилади.