Жиноий активларни бошқариш ва уларни тасарруф қилиш лойиҳаси амалга оширилмоқда

Ўзбекистон Республикаси Бош прокуратураси Академияси ҳамда БМТнинг Гиёҳвандлик ва жиноятчилик бўйича бошқармаси (UNODC) билан ҳамкорликда жиноий активларни бошқариш ва уларни тасарруф қилиш лойиҳаси йўлга қўйилди. Лойиҳанинг биринчи босқичида жиноий ишларни тергов қилиш ёки фуқаролик процесси жараёнида хатланган ва мусодара қилинган жиноий активларни бошқариш соҳасидаги бугунги кундаги ҳолат ҳамда қонунчиликни баҳолаш режалаштирилган.

Лойиҳа доирасида Академия ҳамда UNODC томонидан Буюк Британиядан жалб қилинган эксперт Пол Милваганам (Paul Mylvaganam) иштирокида тергов, суд ва бошқа давлат органлари учун Ўзбекистон Республикасининг хатланган ва мусодара қилинган активларни бошқариш ва тасарруф қилиш соҳасидаги қонун ҳужжатлари ва амалиётини таҳлил қилиш мақсадида саволнома ишлаб чиқилди. Шунингдек, ушбу соҳага тегишли бўлган масалалар ва мавжуд камчиликларни муҳокама қилиш бўйича тегишли ташкилотларнинг масъул ходимлари билан онлайн учрашувлар ташкил қилинди.

Лойиҳанинг биринчи босқичи якунлари бўйича жиноий активларни бошқариш ва уларни тасарруф қилиш борасидаги Ўзбекистон Республикаси қонунчилиги ва амалиётини такомиллаштириш юзасидан таклиф ва тавсияларни ўз ичига олган ҳисоботни ишлаб чиқиш назарда тутилмоқда.