Маъмурий суд ишларини юритиш масалалари бўйича республика онлайн семинар-тренинги бўлиб ўтди

Бош прокуратура Академиясида Германия Халқаро ҳамкорлик ташкилотининг (GIZ) “Марказий Осиёда ҳуқуқий давлатчиликка кўмаклашиш” минтақавий дастурининг Ўзбекистондаги вакили билан ҳамкорликда Ўзбекистон Республикаси Бош прокуратураси, Олий суди, Судьялар олий кенгаши ҳузуридаги Судьялар олий мактаби, Ўзбекистон адвокатлар Палатаси вакиллари ҳамда вилоят прокуратуралари ва уларга тенглаштирилган прокуратураларнинг масъул ходимлари иштирокида маъмурий суд ишларини юритишда мавжуд муаммолар муҳокамасига бағишланган республика онлайн семинар-тренинги бўлиб ўтди.

Тадбир давомида маъмурий судга тааллуқли ишлар борасидаги назарий ва амалий масалалар кўриб чиқилди.

Семинар-тренингда маъмурий органлар қарорлари ва ушбу органлар мансабдор шахсларининг ҳаракатларига оид низолар, инвестициявий низолар ва рақобат тўғрисидаги ишларнинг судларга тааллуқлилик масалаларини аниқлашда аҳамият берилиши лозим бўлган масалалар, идоравий норматив-ҳуқуқий ҳужжатни ҳақиқий эмас деб топиш тўғрисидаги ишларнинг ўзига хос жиҳатлари юзасидан қилинган маърузалар бўйича мунозаралар бўлиб ўтди.

Маъмурий судларга тааллуқли ишларни фуқаролик ва иқтисодий судларга тааллуқли ишлардан ажрата олиш, ушбу судларда ишларни кўришнинг ўзига хос хусусиятлари масалаларига алоҳида эътибор қаратилиб, қонунчиликда бу борада белгиланган нормалар юзасидан тегишли тушунтиришлар берилди.