ТДЮУ билан ҳамкорлик янада мустаҳкамланмоқда

Бош прокуратура Академиясида Тошкент давлат юридик университети талабалари учун “Прокуратура органлари фаолиятининг асосий йўналишлари ва прокуратура ходимларининг касб ахлоқи” мавзусида навбатдаги маҳорат дарси ўтказилди.

Мазкур маҳорат дарслар Ўзбекистон Республикаси Президентининг 2020 йил 29 июндаги “Ўзбекистон Республикасида юридик таълим ва фанни тубдан такомиллаштириш бўйича қўшимча чора-тадбирлар тўғрисида”ги ПФ–5987-сон Фармонида белгиланган вазифаларни амалга ошириш юзасидан Академия ва ТДЮУ ўртасида имзоланган Комплекс чора-тадбирлар дастури  доирасида мунтазам ўтказиб келинмоқда.

Машғулотда Академия профессор-ўқитувчилари ва университетнинг 30 нафарга яқин талабалари  иштирок этдилар.

Тадбир давомида талабалар Академия кафедралари, бўлим ҳамда марказлари фаолияти, шунингдек ўқув жараёни, илмий-тадқиқот ҳамда таҳлилий фаолиятнинг ташкил этилиши билан атрофлича танишиш имкониятига эга бўлдилар.

Шунингдек, талабалар учун Академия биноси бўйлаб экскурсия ташкил этилди. Экскурсия давомида талабалар суд процесси имитацияси хонаси, криминалистика хонаси ва полигони, электрон тир ва бошқа амалий ҳамда вазиятли машғулотлар ўтказиш учун махсус жиҳозланган хоналар, шунингдек Академия ўқув аудиторияларини кўздан кечиришди.

Талабаларда шунингдек электрон (масофавий) ўқитиш, воқеа жойини виртуал кўздан кечириш, Академия мультимедиа марказининг имкониятлари қизиқиш уйғотди.

Талабалар ўзларини қизиқтирган саволларга жавоб олдилар.