“Коррупция ва иқтисодий жиноятчиликка қарши курашиш” халқаро тренингида иштирок этилди

Бош прокуратура Академияси ходимлари Уюшган жиноятчиликнинг олдини олиш ва унга қарши курашиш соҳасида ҳуқуқни муҳофаза қилувчи органлар ходимлари малакасини ошириш Халқаро мактаби (International School of Caserta, Казерта, Италия) томонидан 2021 йил 24 май – 4 июнь кунлари ташкил этилган “Коррупция ва иқтисодий жиноятчиликка қарши курашиш” мавзусидаги халқаро тренингда иштирок этдилар.

Тадбир давомида Ҳуқуқни муҳофаза қилувчи органлар ходимлари малакасини ошириш Халқаро мактаби вакиллари, шунингдек Италия Жамоат хавфсизлиги департаменти, Карабинерлар корпуслари Миллий полицияси, Молиявий гвардия вакилларидан иборат амалиётчилар томонидан тингловчиларга коррупция ва иқтисодий жиноятларга қарши курашиш тажрибаси, коррупциявий ҳуқуқбузарликларни аниқлаш методикаси, шунингдек, миллий ва трансмиллий уюшган жиноятчиликка қарши курашишнинг институционал ва ташкилий-ҳуқуқий усуллари борасида батафсил маълумот берилди.

Тренинг давомида ҳуқуқни муҳофаза қилиш органларининг ушбу соҳадаги халқаро ҳамкорлик амалиётига алоҳида эътибор қаратилди.

Халқаро тренинг иштирокчиларнинг коррупция ва иқтисодий жиноятларга қарши курашиш борасидаги билимлари кўламини кенгайтириш, шунингдек коррупциянинг олдини олиш ва унга қарши курашишни миллий ва халқаро даражаларда ташкил этиш соҳасида салоҳиятини юксалтиришга хизмат қилди.