Aкадемия ходимлари коррупцияга қарши курашиш бўйича халқаро мутахассислар учун онлайн вебинарда иштирок этишди

Aкадемия ходимлари коррупцияга қарши курашиш бўйича халқаро мутахассислар учун Корея Республикасининг Коррупцияга қарши курашиш ва инсон ҳуқуқлари бўйича комиссияси (ACРC) томонидан ўташкил этилган халқаро онлайн вебинарда қатнашдилар.

Коррупцияга қарши курашиш ва инсон ҳуқуқлари бўйича комиссия ҳузуридаги Коррупцияга қарши таълим институти (ACТI) маърузачилари Корея Республикасида коррупцияга қарши курашиш борасидаги ҳуқуқий сиёсат ва институционал асослар, коррупцияга қарши стратегиялар, коррупцияни ўлчаш, коррупциявий жиноятларни тергов қилиш, шунингдек порахўрликка қарши курашиш бўйича халқаро чора-тадбирлар каби мавзуларда машғулотлар ўтказдилар.

Вебинар давомида тингловчилар AҚШ, Буюк Британия, Aвстралия, Япония, шунингдек Корея Республикасининг коррупцияга қарши стратегиясини шакллантириш ва амалга ошириш борасидаги миллий ва ҳудудий даражадаги тажрибаси, қонунчилик базаси, коррупцияга оид ҳуқуқбузарликларни тергов қилишнинг тактикаси ва усуллари, коррупция хавфини баҳолаш, коррупция ҳақида хабар берувчиларни ҳимоя қилишнинг институционал ва ташкилий-ҳуқуқий тизими билан танишдилар.

Тадбирда қатнашиш Aкадемия профессор-ўқитувчиларига ва Бош прокуратура ходимларига коррупцияга қарши тизимли курашиш соҳасида ўз билим ва кўникмаларини мустаҳкамлаш, коррупцияга оид ҳуқуқбузарликларни тергов қилишнинг илғор хорижий тактикаси ва методикаси билан яқиндан танишиш имконини берди.