Академияда онлайн очиқ эшиклар куни

Юридик олий таълим муассасалари битирувчиларини Бош прокуратура Академияси магистратурасида таҳсил олиш истиқболлари, магистратурага қабул қилиш тартиби, шунингдек таълим жараёнидаги мавжуд имкониятлар ва афзалликлар  билан таништириш мақсадида Академия томонидан очиқ эшиклар куни мунтазам ташкил этиб келинмоқда. 

Навбатдаги мазкур тадбир коронавирус инфекцияси тарқалишининг олдини олиш мақсадида онлайн режимда ташкил этилди.

Онлайн учрашувларда Бош прокуратура Академияси ходимлари,  магистратура битирувчилари ва тингловчилари, шу жумладан, Лунд университетида (Швеция) таҳсил олаётган магистрантлар, шунингдек Тошкент давлат юридик университети, Жаҳон иқтисодиёти ва дипломатия университети ҳамда Тошкентдаги Вестминстер халқаро университети масъул ходимлари, бакалавр босқичи битирувчилари ва талабалари иштирок этди.

Тадбирда Бош прокуратура Академияси фаолияти, магистратурага қабул ва унда ўқишнинг ўзига хос афзалликлари ҳақида батафсил маълумот берилди.

Талабалар Академияда магистратура мутахассисликлари бўйича ўқитиш тизимининг жорий қилинганлиги, назария ва амалиётнинг уйғунлиги, хорижий давлатларнинг нуфузли олий таълим муассасалари экспертларининг таълим жараёнига жалб қилиниши ҳамда талабаларнинг академик мобиллик дастурлари доирасида хорижий таълим муассасаларида ўқиш имконияти мавжудлигига алоҳида қизиқиш билдирдилар.

Учрашув давомида талабалардан келиб тушган саволларга батафсил жавоблар берилди.