Мажбурий ижро бюросига янги қабул қилинган давлат ижрочилари иштирокидаги малака ошириш курси бошланди

Ўзбекистон Республикаси Президентининг “Суд ҳужжатлари ва бошқа органлар ҳужжатларини ижро этиш тизимини янада такомиллаштириш чора-тадбирлари тўғрисида”ги ПФ–6118-сонли Фармон талаблари ижросини таъминлаш мақсадида 2021 йилнинг 5 июлидан бошлаб Бош прокуратура Академияси томонидан Мажбурий ижро бюросининг давлат ижрочилари учун “Ёш мутахассисларни касбга тайёрлаш” мавзусида масофавий малака ошириш курси бошланди.

Курс дастури тизимга янги қабул қилинган давлат ижрочиларининг ижрога келиб тушган барча турдаги ижро ҳужжатларини ижро этиш, сифатли процессуал ҳужжатларни тайёрлаш, хизматдаги низоларни бартараф этиш, Бюро органларида фойдаланиладиган ахборот тизимлари ва дастурий комплекслар билан ишлашга доир профессионал кўникмаларини шакллантиришга қаратилган.

Ўқув машғулотларида янги қабул қилинган давлат ижрочилари психология ва вақтни бошқариш (тайм-менежмент) асослари, касб одобномаси қоидалари билан таништирилиб, уларга қатъий амал қилиш кўникмаларига эга бўлади.

Ўқув курси якунида синов имтиҳонлари ўтказилиб, ўқув курсини ижобий натижалар билан якунлаган тингловчиларга малака оширганлик тўғрисида сертификатлар топшириш режалаштирилган.