Пандемия шароитида Бош прокуратура Академияси олдида турган вазифалар муҳокама қилинди

2020 йил 29 апрель куни Ўзбекистон Республикаси Бош прокуратураси Академияси Кенгашининг навбатдаги мажлиси бўлиб ўтди.

Аудиоселектор шаклида ўтказилган мажлисда Академия тармоқларининг олиб бораётган фаолияти ва келгусидаги вазифалари муҳокама қилинди.

Мажлисда мамлакатдаги санитария-эпидемиологик вазиятдан келиб чиққан ҳолда Академияда мавжуд куч ва воситаларни қайта кўриб чиқиш, кадрларни тайёрлаш, қайта тайёрлаш ва малакасини оширишнинг масофавий таълим шаклини янада кенгайтириш, магистратура тингловчиларнинг амалиётини ташкил этиш, якуний имтиҳон ва диссертация ишлари муҳокамасини ўтказиш бўйича вазифалар белгилаб олинди.

Мамлакатдаги вазиятдан келиб чиқиб, ўқув-методик мажмуаларни таълимнинг электрон шаклини назарда тутган ҳолда қайта кўриб чиқиш, методика, таҳлилий ва қонун ижодкорлиги фаолиятини кучайтириш ҳамда илмий-амалий тадқиқотларни фаоллаштириш бўйича чора-тадбирлари белгиланди.

Мажлисда Академия профессор-ўқитувчилари томонидан тайёрланган “Legal English Course for Prosecutors” (Прокурорлар учун ҳуқуқий инглиз тили) ўқув қўлланмаси, шунингдек “Прокурорнинг суддаги иштирокининг процессуал-ҳуқуқий асослари” монографияси, “Прокуратура органлари раҳбар кадрларини баҳолаш ва психологик хусусиятларини ўрганиш услубларини жорий этиш” номли илмий-методик қўлланма ва бошқа шу каби ўқув-услубий материаллар муҳокама қилинди ва нашрга тавсия этилди.