Прокуратура органларида раҳбарлик лавозимларини эгаллаш учун захирада турган кадрларни қайта тайёрлаш курси якунланди

Ўзбекистон Республикаси Бош прокуратураси Академиясида прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курси якунланди.

Курс дастури республикамизда олиб борилаётган суд-ҳуқуқ тизимидаги ислоҳотларнинг мазмун-моҳиятини, бу борада прокуратура органлари раҳбар кадрлари олдига қўйилган вазифаларни атрофлича ёритиш, мазкур вазифаларни амалга ошириш учун ҳар бир раҳбарда тегишли бошқарув ва касбий компетенцияларни шакллантириш ҳамда уларнинг тизимли таҳлил ва танқидий фикрлаш қобилиятларини ривожлантиришга қаратилди.

Ушбу қайта тайёрлаш курси ҳам мазмунан, ҳам илмий-методик жиҳатдан янгича ёндашувлар асосида, илғор педагогик ва ахборот технологияларидан, хорижий инновацион тажрибалардан фойдаланган ҳолда ташкил этилди.

Ўқув жараёнига Ўзбекистон Республикаси Олий Мажлис Сенати ва Қонунчилик палатаси, “Тараққиёт стратегияси” маркази, Адлия вазирлиги, Ички ишлар вазирлиги, Ташқи ишлар вазирлиги, Ўзбекистон Республикаси Президенти ҳузуридаги  Лойиҳа бошқаруви миллий агентлиги, Электрон ҳукумат тизимини ривожлантириш маркази ҳамда бошқа вазирлик ва идораларнинг тажрибали мутахассис ва экспертлари жалб қилинди.

Курс давомида амалиётга алоҳида эътибор қаратилди. Тошкент шаҳар прокуратураси, тегишли вазирлик, идора ва ташкилотларда ташкил этилган амалиёт даврида тингловчилар томонидан танланган долзарб мавзулар асосида тадқиқот ишлари олиб борилиб, курс якунида тингловчилар имтиҳон комиссияси ҳузурида тадқиқот ишлари натижаларини тақдимот қилдилар.