Судларда фуқаролик ишлари кўрилишида тарафлар тортишуви ва тенг ҳуқуқлилиги тамойилининг таъминланиши: муаммо ва ечимлар

Жорий йилнинг 17 ноябрь куни Ўзбекистон Республикаси Бош прокуратураси Академиясида Бош прокуратуранинг Фуқаролик суд ишларини юритишда прокурор ваколатини таъминлаш бошқармаси, Ўзбекистон Республикаси Олий суди ҳамда Судьялар олий кенгаши ҳузуридаги Одил судлов муаммоларини ўрганиш тадқиқот маркази билан ҳамкорликда прокуратура органлари ходимлари, судьялар ва адвокатлар учун видеоконференцалоқа шаклида “Судларда фуқаролик ишлари кўрилишида тарафлар тортишуви ва тенг ҳуқуқлилиги тамойилининг таъминланиши: муаммо ва ечимлар” мавзусида Республика семинар тренинги ташкил этилди. 

Ушбу тадбирда Олий суднинг фуқаролик ишлари бўйича судлов ҳайъати судьялари, Судьялар олий кенгаши ҳузуридаги Одил судлов муаммоларини ўрганиш тадқиқот маркази масъул ходимлари, фуқаролик ишлари бўйича ҳудудий судларнинг раислари ва судьялари, адвокатлар, Бош прокуратура ходимлари, Бош прокуратура Академияси профессор-ўқитувчилари ва тингловчилари, Қорақалпоғистон Республикаси, вилоятлар, Тошкент шаҳар, туман (шаҳар) ва уларга тенглаштирилган прокуратуралар ходимлари ҳамда оммавий ахборот воситалари вакиллари иштирок этишди. 

Семинар  давомида суд амалиётида мавжуд бўлган бир қатор тизимли камчиликлар, хусусан, фуқаролик процессида далилларни тақдим этиш ва ўрганишда тарафларнинг тенг ҳуқуқлилиги тўлиқ таъминланмаслиги, судлар томонидан тегишли тартибда экспертизалар тайинлашда процесс иштирокчиларининг фикр-мулоҳазаларини ўрганмаслик, тарафлар тортишуви принципларининг бузилиши, шунингдек, суд маслаҳатига оид қоидаларга амал қилмасликда ифодаланувчи ва судлар томонидан асослантирилмаган ҳамда адолатсиз қарорлар қабул қилинишига сабаб бўлаётган суд процессини юритиш қоидаларининг бузилиши каби ҳолатлар муҳокама қилинди.

Тадбир иштирокчилари томонидан, шунингдек, алоҳида тоифадаги фуқароллик ишлари, хусусан, аҳолининг ижтимоий ҳимояга муҳтож қатламлари ҳуқуқ ва қонуний манфаатларини ҳимоя қилиш ҳақидаги ишларда адвокатлар иштирокини кенгайтириш зарурати ҳақидаги таклифлар илгари сурилди.

Муҳокама натижасига кўра юқорида қайд этилган камчиликларни бартараф этиш, фуқаролик суд ишларини юритишда прокурор ваколатини таъминлаш ҳамда одил судловни амалга ошириш самарадорлигини оширишга қаратилган тавсиялар ишлаб чиқилди.