Тадқиқотнинг дастлабки натижалари муҳокама қилинди

         Академик мобилликни ривожлантириш, қўшма илмий тадқиқотларни амалга ошириш, таълим жараёнига хорижий мутахассисларни жалб қилиш, педагог, илмий ходимлар ва тингловчиларнинг стажировкаларини тизимли равишда ташкил этиш Академия фаолиятининг устувор йўналишларидан биридир.

        Айни дамда Бош прокуратура Академиясида Швециянинг Лунд университети билан ҳамкорликдаги лойиҳа доирасида Латвия университети доценти, юридик фанлари доктори И.Калнина стажировка ўтаётган бўлиб, у Ўзбекистон Республикасининг экспортни ривожлантириш борасидаги тажрибасини ўрганишга бағишланган тадқиқотни амалга оширмоқда.

       Мазкур тадқиқотнинг дастлабки натижалари бўйича тақдимот Академияда Ўзбекистон Республикаси Инвестициялар ва ташқи савдо вазирлиги, Савдо-саноат палатаси,  Иқтисодий тараққиёт ва камбағалликни қисқартириш вазирлиги ҳузуридаги Прогнозлаштириш ва макроиқтисодий тадқиқотлар институти, Ташқи савдо вазирлиги ҳузуридаги Экспортни рағбатлантириш агентлиги мутахассислари ҳамда Бош прокуратура ва Бош прокуратура Академияси ходимлари иштирокида бўлиб ўтди.

       Тадбир давомида тадқиқотнинг дастлабки натижалари бўйича тегишли идоралар мутахассислари томонидан фикр ва мулоҳазалар, таклифлар билдирилди.

       Шунингдек, Ўзбекистон Республикасида экспортни ривожлантириш борасида амалга оширилган чора-тадбирлар билан атрофлича таништириш ва И.Калнина томонидан ўтказилаётган тадқиқот самарадорлигини таъминлаш мақсадида бевосита мутасадди идораларда қўшимча учрашувлар ўтказиш ҳақида келишиб олинди.