Жиноий фаолиятдан олинган даромадларни легаллаштириш ва терроризмни молиялаштириш хавфларини минтақавий даражада баҳолаш бўйича лойиҳа гуруҳининг учрашуви

       Бош прокуратура Академиясида жиноий фаолиятдан олинган даромадларни легаллаштириш ва терроризмни молиялаштириш хавфларини минтақавий даражада баҳолаш бўйича лойиҳа гуруҳининг учрашуви ташкил этилди.

     Жиноий фаолиятдан олинган даромадларни легаллаштириш ва терроризмни молиялаштириш бўйича хавфларни минтақавий даражада баҳолаш ва уларни камайтириш бўйича тавсиялар ишлаб чиқиш Жиноий даромадларни легаллаштиришга ва терроризмни молиялаштиришга қарши курашиш бўйича Евроосиё гуруҳининг 30–ялпи мажлисида тасдиқланган 2019–2023 йилларга мўлжалланган Евроосиё гуруҳи Стратегиясининг йўналишларидан бири ҳисобланади.

     Ташрифдан кўзланган мақсад "Марказий Осиё давлатлари ва Россия Федерацияси" субрегиони учун жиноий фаолиятдан олинган даромадларни легаллаштириш ва терроризмни молиялаштириш бўйича  минтақавий хавфлар бўйича ҳуқуқни муҳофаза қилиш ва назорат қилувчи органлар, шунингдек хусусий сектор вакиллари билан оралиқ хулосаларни  муҳокама қилишдир.

  Баҳолашни амалга ошириш учун Беларусь, Қирғизистон, Тожикистон, Туркманистон, Ўзбекистон экспертлари ва Евроосиё гуруҳи Котибияти ходимларидан иборат лойиҳа гуруҳи шакллантирилган.

    Лойиҳа гуруҳи таркибига Ўзбекистондан Бош прокуратура Академияси, Иқтисодий жиноятларга қарши курашиш департаменти ва Ички ишлар вазирлиги вакиллари кирган.

   Лойиҳа гуруҳи йиғилишида жиноий фаолиятдан олинган даромадларни легаллаштириш ва терроризмни молиялаштиришга қарши курашиш тизимининг самарали ишлашига ҳисса қўшадиган, аниқланган хавфларни минималлаштиришда фойдали ва Евроосиё гуруҳининг бошқа мамлакатлари учун қизиқ бўлган энг самарали тажрибалар муҳокама қилинди.