Жиноий активларни бошқариш ва уларни тасарруф қилиш лойиҳаси биринчи босқичининг дастлабки якунлари

Жиноятчиларнинг ноқонуний бойиб кетишининг олдини олиш ҳамда жиноят содир этиш натижасида зарарни қоплашни таъминлаш мақсадида ҳуқуқни муҳофаза қилувчи органлар томонидан хатланган мол-мулкларни сақлаш ва уларнинг қийматини ошириш долзарб ҳисобланади.

Мазкур маблағлар жиноят содир этилиши оқибатида зарар кўрган жабрланувчиларнинг компенсациясига йўналтирилиши ҳамда давлатнинг муҳим ижтимоий талабларини қондириш учун ишлатилиши мумкин.

Шу билан бирга, мамлакатимизда жиноий активларни бошқариш ва уларни тасарруф қилиш тизимини такомиллаштириш бугунги кунда муҳим аҳамиятга эга.

Ушбу мақсадда Бош прокуратура Академиясида БМТнинг Гиёҳвандлик ва жиноятчилик бўйича бошқармаси (БМТ ГЖБ) билан ҳамкорликда жиноий активларни бошқариш ва уларни тасарруф қилиш лойиҳаси доирасида ишчи гуруҳи йиғилиши ўтказилди.

Лойиҳа Ўзбекистонда Барқарор ривожланиш мақсадларга эришиш учун БМТнинг Молиялаштиришнинг интеграциялашган миллий механизмини (INFF) яратиш бўйича қўшма дастурини имлементация қилиш доирасида амалга оширилмоқда.

Бундан ташқари, лойиҳада белгиланган вазифалар Ўзбекистон Республикасининг жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш миллий тизимини ривожлантириш стратегияси, шунингдек Коррупцияга қарши конвенция талаблари ва ФАТФ тавсияларига асосланади.

Тадбирда БМТ ГЖБ вакиллари, хорижий экспертлар ҳамда Бош прокуратура, ИИВ, ДХХ, Молия вазирлиги, Давлат солиқ қўмитаси, Марказий банк, Давлат активларини бошқариш агентлиги, Лойиҳаларни бошқариш миллий агентлиги масъул ходимлари иштирок этишди.

Йиғилишда лойиҳанинг биринчи босқичи якунлари бўйича Буюк Британиялик эксперт Пол Милваганам томонидан миллий экспертлар билан ҳамкорликда тайёрланган жиноий активларни бошқариш ва уларни тасарруф қилиш бўйича Ўзбекистон Республикаси қонунчилиги ҳамда амалиётини такомиллаштириш юзасидан таклиф ва тавсияларни ўз ичига олган ҳисоботнинг тақдимоти бўлиб ўтди.

Бундан ташқари жиноий активларни бошқариш бўйича хорижий эксперт Айдан Ларкин ва БМТ ГЖБ штаб квартираси вакили Фелипе Фалкони ҳисобот юзасидан ўзларининг фикр ва мулоҳазаларини билдиришиб, ушбу соҳада бугунги кунда юзага келаётган муаммолар ва уларнинг ечимлари, илғор тажриба ва амалиёт билан йиғилиш иштирокчиларини таништиришди.

Тадбир якунида иштирокчилар жиноий активларни бошқариш миллий тизимини такомиллаштириш бўйича ҳисобга олиниши лозим бўлган қўшимча жиҳатларни таъкидлаб ўтишди.