ЮРИДИК СОҲАДА ДАВЛАТ ТИЛИНИНГ ЎРНИ ВА АҲАМИЯТИ

Ўзбекистон Республикаси Бош прокуратураси томонидан Давлат тили байрами муносабати билан ходимларнинг нутқ маданиятини ошириш ҳамда давлат тилида иш юритишга оид амалий кўникмаларини ривожлантиришга қаратилган “Юридик соҳада давлат тилининг ўрни ва аҳамияти” мавзусида танлов ташкил этилди.

Танлов учта йўналиш: эсселар танлови, билимдонлик танлови ҳамда шеърхонлик танловидан иборат бўлиб, мазкур йўналишларнинг ҳар бири дастлабки саралаш босқичи ва якуний босқичларни ўз ичига олади.

Якуний босқич натижаларига кўра, танлов ғолиблари ҳамда алоҳида номинациялар соҳибларини пул мукофоти, диплом ва бошқа рағбатлантириш воситалари билан тақдирлаш назарда тутилган.

12 октябрь куни танловнинг “Билимдонлик” йўналиши бўйича иккинчи босқичи, яъни лотин ёзувига асосланган ўзбек адабий тили меъёрларига доир тест синовларидан муваффақиятли ўтган ходимлардан диктант қабул қилиш жараёни бўлиб ўтди.

Танлов тадбирларини ўтказишда уларнинг юқори савияда, холис ва шаффоф ташкил этилишига алоҳида эътибор қаратилмоқда.