Туркий Кенгаш давлатларининг одил судлов соҳасидаги таълим муассасаларининг биринчи йиғилишида иштирок этилди

Бош прокуратура Академияси вакиллари Туркиянинг Анқара шаҳрида ўтказилган Туркий Кенгаш давлатлари одил судлов соҳасидаги таълим муассасаларининг биринчи йиғилишида иштирок этдилар.

Тадбирда Озарбайжон, Қозоғистон, Қирғизистон, Туркия ва Ўзбекистон вакиллари иштирок этди.

Тадбир давомида Туркий Кенгаш давлатлари вакилларининг таълим муассасалари борасидаги маърузалари эшитилди, Туркий Кенгаш давлатларининг Одил судлов соҳасидаги таълим муассасалари ассоциациясини ташкил этиш масалалари, шунингдек, таълим соҳасида ҳамкорликни ривожлантириш чора-тадбирлари муҳокама қилинди.

Хусусан, тадбир доирасида Ўзбекистон Республикаси Бош прокуратураси Академиясининг прокурор кадрларни тайёрлаш, қайта тайёрлаш ва малакасини ошириш соҳасидаги тажрибаси борасида маълумот берилди. Академия ўқув жараёнига замонавий ахборот технологиялари ва ўқитиш усулларини жорий этиш масалалари иштирокчиларда катта қизиқиш уйғотди.

Тадбир давомида Туркия Одил судлов Академиясига танишув ташрифи ташкил этилиб, унда иштирокчилар Академия фаолияти ва ўқув инфратузилмаси билан яқиндан танишдилар.

Шунингдек, Адлия вазири А.Гул, Туркия Олий кассация суди раиси М.Акарджа ва Кассация суди Бош прокурори Б.Шаҳин билан учрашувлар ўтказилди.

Бундан ташқари, Туркия Маъмурий ишлар бўйича Олий судига, Судьялар ва прокурорлар Кенгашига, шунингдек, Анқара шаҳридаги Адолат саройига ташриф уюштирилиб, мазкур идоралар раҳбариятлари билан учрашувлар ўтказилди.

Тадбир илиқ, дўстона муҳитда ўтди, томонлар одил судлов соҳасида кадрлар салоҳиятини янада мустаҳкамлаш мақсадида таълим муассасалари ўртасида ўзаро манфаатли ҳамкорликни янада ривожлантиришдан манфаатдор эканликларини билдиришди.