Халқаро давра суҳбатида иштирок этилди

 Бош прокуратура Академияси раҳбарияти ва ходимлари Россия Федерацияси Тергов қўмитаси ва Ўзбекистон Республикаси Бош прокуратураси ўртасидаги 2020–2021 йилларга мўлжалланган ҳамкорлик дастурини амалга ошириш доирасида Россия Федерацияси Тергов қўмитаси Санкт-Петербург академиясининг “Тергов органларининг тезкор-қидирув фаолияти билан шуғулланувчи органлар билан ҳамкорлигининг процессуал-ҳуқуқий хусусиятлари” мавзусидаги идоралараро илмий-амалий давра суҳбатида иштирок этдилар.

Тадбирни Россия Федерацияси Тергов қўмитасининг Санкт-Петербург академияси ректори в.б. Е.В.Емелянова ҳамда Ўзбекистон Республикаси Бош прокуратураси Академияси бошлиғи Е.В.Коленко кириш сўзи билан очиб бердилар.

Ўзбекистон Республикаси Бош прокуратураси ҳамда Бош прокуратура Академияси вакиллари тадбирда тергов органларининг тезкор-қидирув фаолиятини амалга оширувчи органлар билан ўзаро ҳамкорлигига оид долзарб мавзуларда маърузалар билан иштирок этдилар.

Тадбирда шунингдек илмий ва ўқув муассасалари ходимлари, Россия Федерацияси ҳуқуқни муҳофаза қилувчи органлари ходимлари, шу жумладан Конституциявий суд, Тергов қўмитасининг Москва академияси, ИИВ Бошқарув академияси, ИИВ Барнаул юридик институти, Бурят давлат университети вакиллари ва бошқалар иштирок этдилар.

Тадбир қизғин баҳс-мунозараларга бой тарзда ўтди. Унда жиноят процессида тезкор-қидирув фаолияти натижаларидан фойдаланиш масалалари, тезкор-қидирув тадбирларида ашёлар ва ҳужжатларни олиб қўйиш, тезкор-қидирув органлари ходимлари томонидан мажбурлов чораларини қўллаш, хорижий давлат ҳудудида тезкор-қидирув фаолиятини олиб боришнинг муаммоли жиҳатлари ҳамда тергов ва тезкор-қидирув бўлинмаларининг ўзаро алоқаларининг бошқа тегишли жиҳатлари муҳокама қилинди.

Тадбир якунида томонлар мазкур йўналишда ҳамкорликни давом эттириш, шу жумладан қўшма илмий тадқиқотларни амалга ошириш, ўқув дастурлари ва модулларини такомиллаштириш борасида келишиб олдилар.