Халқаро экспертлар иштирокида “Коррупцияга қарши курашиш: умумназарий масалалар” мавзусидаги ўқув модули бошланди  

Бош прокуратура Академиясида магистратурининг “Коррупцияга қарши курашиш” йўналиши учун етакчи халқаро экспертлар иштирокида ишлаб чиқилган “Коррупцияга қарши курашиш: умумназарий масалалар” мавзусидаги ўқув модули доирасидаги ўқув машғулотлари бошланди.

Ўқув модули маъруза, амалий машғулот ва мустақил таълим жараёнларидан иборат.

Ўқув машғулотларига етакчи миллий экспертлар билан бир қаторда коррупцияга қарши курашиш соҳасининг АҚШ ва Европалик  нуфузли экспертлари жалб этилган.

Хусусан, халқаро эксперт Горан Клеменчич (Словения) томонидан коррупцияга қарши курашишга оид асосий назария, ёндашув ҳамда амалий тадбирлар, коррупциявий хавф-хатарлар, ҳуқуқбузарликларнинг олдини олишнинг таъсирчан чоралари, шаффофликни таъминлаш, бу борадаги стратегиялар ва ваколатли органларнинг вазифалари, давлат ва хусусий секторда коррупциянинг олдини олиш ва уни бартараф этиш масалалари бўйича маърузалар ва амалий машғулотлар ўтказилмоқда.

Илғор хорижий тажриба асосида ишлаб чиқилган мазкур ўқув модули магистратура тингловчиларининг коррупцияга қарши самарали фаолиятни ташкил этиш ва амалга ошириш борасидаги касбий компетенцияларини ривожлантиришга хизмат қилади.