Ўзбекистон Республикасининг Давлат байроғи қабул қилинган кун муносабати билан давра суҳбати ўтказилди

Давлатимиз суверенитетининг рамзларидан бири – давлатимиз байроғидир.

Шу муносабат билан жорий йилнинг 18 ноябрь куни Бош прокуратура Академиясида Бош прокуратура ҳамда Академия ходимлари, магистратура тингловчилари, мустақил изланувчилар ва докторантлар иштирокида давра суҳбати ташкил этилди.

Тадбирга Тошкент давлат юридик университети профессори, юридик фанлари доктори, профессор Ф.А.Мухитдинова таклиф этилди.

Давра суҳбатида “Ўзбекистон Республикасининг Давлат байроғи тўғрисида”ги Қонуннинг қабул қилиниши тарихи, унинг давлат сиёсий ҳаётидаги аҳамияти, ўзига хос жиҳатлари ҳамда байроғимизнинг тавсифи ҳақида батафсил сўз юритилди.

Хусусан, байроғимиз ўзида бутун Ўзбекистон халқининг асрий орзу-истаклари, ғайрати ва шижоатини, халқимизга хос меҳмондўстликни мужассам этгани, миллий байроғимизнинг давлат идора ва муассасалари, ўқув юртлари, Ўзбекистон аъзо бўлган халқаро ташкилотлар, чет эллардаги элчихона ва доимий ваколатхоналаримиз пештоқида ҳилпираб туриши, турли байрам ва тантаналарда, мамлакатимиз вакиллари қатнашаётган халқаро миқёсдаги сиёсий, маданий-маърифий тадбирларда, нуфузли спорт мусобақаларида Ватанимизнинг шаъни, халқимизнинг ғурурини ёрқин акс эттириши барчамизга ифтихор бахш этиши алоҳида таъкидланди.

Шунингдек, тадбирда иштирок этган Академия магистратураси тингловчилари “Ўзбекистон Республикасининг Давлат байроғи тўғрисида”ги Қонун, мазкур ҳужжатнинг жамият ҳаётидаги тутган ўрни ҳамда унга риоя этишнинг аҳамияти, ушбу Қонун талаби бузилганлиги учун жавобгарлик масалалари ҳақида тушунтириш бердилар.