Бош прокуратура Академиясида очиқ эшиклар куни

2021 йил 1 декабрь куни Ўзбекистон Республикаси Бош прокуратураси Академиясида очиқ эшиклар куни бўлиб ўтди.

Шу куни Академияга Тошкент давлат юридик университети талабалари, юридик лицей ҳамда Тошкентдаги Президент мактаби ўқувчилари, магистратура тингловчиларининг ота-оналари, шунингдек, ОАВ вакиллари, блогерлар ҳамда интернет журналистика соҳасида фаолият кўрсатаётган мутахассислар ташриф буюрдилар.

Ўқувчи ва талаба ёшлар учун Академия томонидан очиқ дарс ташкил этилиб, Ўзбекистон Республикаси прокуратураси тарихи ҳамда прокуратура органларининг бугунги кунда амалга ошираётган фаолиятига оид атрофлича маълумот берилди. Очиқ дарс мультимедиа имкониятларидан фойдаланган ҳолда ўтказилиб, ёшларда катта қизиқиш уйғотди.

Меҳмонларни прокуратура органлари кадрларини тайёрлаш, қайта тайёрлаш ва уларнинг малакасини ошириш тизими билан яқиндан таништириш мақсадида  Бош прокуратура Академиясига экскурсия ташкил этилди.

Тадбир давомида ўқувчи ва талаба ёшлар бугунги кунда муҳим аҳамият касб этган масофавий таълим имкониятлари, шу жумладан замонавий ўқув контенти ишлаб чиқиладиган мультимедиа студияси фаолияти билан яқиндан танишишди.

Академиянинг махсус полигонида иштирокчилар тергов-криминалистика тактикалари ва методикаларини амалий қўллаш имитациясида, шунингдек воқеа жойини кўздан кечириш ва жиноятни очишга оид қизиқарли квест мусобақасида иштирок этишди, ушбу синовда ғолиб бўлган зукко ва билимдон ёшларга китоблар совға қилинди.

Шу биолан бирга, экскурсия давомида меҳмонлар суд процесси имитацияси хонаси, криминалистика хонаси, электрон тир ва бошқа амалий ҳамда вазиятли машғулотлар ўтказиш учун махсус жиҳозланган хоналар, шунингдек Академия ўқув аудиторияларида дарс жараёнларини кузатиш имконига эга бўлишди.

Юридик таълим муассасасалари ўқувчиларида Академия магистратурасининг “Прокурорлик фаолияти”, “Тергов фаолияти”, “Коррупцияга қарши курашиш” ҳамда жорий ўқув йилидан бошлаб киритилган “Инсон ҳуқуқларига оид халқаро ҳуқуқ” ўқув дастурлари катта қизиқиш уйғотди. Ёшлар Академия магистратурасига кириш ва таҳсил олиш тартибига оид саволларига атрофлича жавоб олишди.

Ёш авлод вакиллари Академия фаолиятини рақамлаштириш ва ахборот-коммуникация технологияларини кенг жорий этиш жараёнларига оид маълумотга эга бўлдилар. Дастурий таъминотлар билан танишиб, махсус дастурлар воситасида ташкил этилган қизиқарли беллашувда иштирок этдилар.

Тадбирда меҳмонлар шунингдек қизиқарли психологик тест синовида қатнашдилар, Академия таянч докторанти диссертациясининг кафедра муҳокамасини кузатдилар, шунингдек мобил криминалистик автолаборатория имкониятлари билан танишиб олдилар.

Академияда очиқ эшиклар куни ўтказиш яхши анъанага айланиб бўлди, бундай тадбирлар тизимли равишда ўтказиб келинади.