Жиноий активларга бенефициар эгалик қилишни аниқлаш бўйича халқаро тренинг

Бош прокуратура Академияси Ғарбий ва Марказий Осиё давлатларининг активларни қайтариш бўйича идоралараро тармоғи
(ARIN-WCA) Котибияти вазифасини амалга ошириши доирасида БМТнинг Гиёҳвандлик ва жиноятчилик бўйича бошқармаси билан ҳамкорликда мазкур тармоқ аъзо давлатлар вакиллари учун “Жиноий активларга бенефициар эгалик қилишни аниқлаш” мавзусида уч кунлик ўқув тренинги ташкиллаштирди.

Тадбир аралаш (онлайн ва анъанавий) шаклда ўтказилиб, унда 12 та давлатдан 30 га яқин вакил иштирок этишди. Хусусан, тренингда иштирок этиш учун Грузия, Озарбайжон, Монголия, Покистон, Қирғизистон, Қозоғистон, Украина давлатларининг прокуратура, ички ишлар, молиявий разведка, коррупцияга қарши курашиш, тергов ҳамда активларни қайтариш ва бошқариш бўйича идораларининг масъул ходимлари Ўзбекистонга ташриф буюришди.

Германия ҳамда Гернси давлатларидан бўлган хорижий экспертлар тренинг иштирокчиларига активларга бенефициар эгалик қилиш асослари, “Пандора рўйхати”, корпоратив ва ҳуқуқий мақомга эга ташкилотларларнинг турлари, турли хил юрисдикцияларда жойлашган иқтисодий тузилмаларда бенефициар мулкдорни аниқлашнинг замонавий ёндашувлари ва механизмлари бўйича ўз тақдимотларини амалга оширишди.

Тренинг давомида гуруҳларда амалий машғулотларни бажариш амалиётининг қўлланилганлиги иштирокчиларга бенефициар эгалик қилишни аниқлаш бўйича ўзларининг тажрибаси ва кўникмалари билан алмашиш имкониятини яратди ҳамда мазкур курснинг натижадорлигини оширишга хизмат қилди.