Коррупцияга қарши конвенциянинг имплементацияси муҳокамасига бағишланган БМТ Модели сессисига старт берилди

Жори йилнинг 9 декабрь куни Бош прокуратура Академиясида БМТнинг Коррупцияга қарши конвенцияси иштирокчи-давлатлари конференцияси шаклидаги БМТ Модели сессиясига старт берилди.

Тадбир Халқаро коррупцияга қарши курашиш кунига бағишлаб ўтказилаётган ҳафталик доирасида Коррупцияга қарши курашиш агентлиги, БМТнинг Гиёхвандлик ва жиноятчилик бўйича бошқармаси ва “Минтақавий мулоқот” ХННТ билан ҳамкорликда ташкил этилди.

Сессияда Тошкент шаҳридаги Халқаро Вестминстер университети, Наманган давлат университети, Тошкент давлат юридик университети, Жаҳон иқтисодиёти ва дипломатия университети, Судьялар олий кенгаши ҳузуридаги Судьялар олий мактаби, Бош прокуратура Академиясининг магистратура тингловчилари иштирок этишди.

Сессиянинг кун тартиби Конвенциянинг II боби – Коррупцияни олдини олиш чора-тадбирлари: оммавий мансабдор шахсларнинг одоб-ахлоқ кодексларига эътибор қаратган ҳолда обзорни амалга ошириш механизми масалаларини ўз ичига олди.

Куннинг биринчи босқичи доирасида иштирокчилар учун “Минтақавий мулоқот” ХННТ эксперти Горан Клименчич ва Бош прокуратура Академияси тренерлари иштирокида семинар-тренинг ташкил этилиб, унда Конвенциянинг 8-моддаси ва обзорни ўтказиш механизмларини амалга ошириш бўйича миллий ва халқаро стандартлар ҳамда илғор хорижий тажрибани ёритиб беришди.

Якуний босқич 24 декабрь куни ролли ўйин шаклида ўтказилади ва унда Олий таълим муассасаларининг юридик соҳадаги магистратура тингловчилари дебатларни ўтказиш қоидаларига асосан БМТ Конвенцияси иштирокчи-давлатлари делегатлари сифатида Конвенциянинг 8-моддаси қоидаларини амалга ошириш ҳисоботларини ҳимоя қилган ҳолда чиқиш қилишади.