Жиноят ишларини юқори суд инстанцияларида кўрилишида суд-прокурор амалиётида юзага келаётган масалаларга оид республика вебинари ўтказилди

Ўзбекистон Республикаси Бош прокуратураси Академиясида “Жиноят ишларини юқори суд инстанцияларида кўрилишида суд-прокурор амалиётида юзага келаётган масалалар” мавзусида вебинар шаклида республика семинар-тренинги ўтказилди.

Вебинарда Бош прокуратуранинг тегишли тармоқлари ходимлари, Ўзбекистон Республикаси Олий суди жиноят ишлари бўйича судлов ҳайъатининг судьялари,  Ўзбекистон Республикаси Судьялар олий кенгаши ҳузуридаги Судьялар олий мактаби, Ўзбекистон Республикаси Адлия вазирлиги Юристлар малакасини ошириш маркази, Адвокатлар Палатасининг вакиллари, Бош прокуратура Академиясининг профессор-ўқитувчилари, шунингдек жойлардаги прокуратура идораларининг соҳа бўйича ходимлари, Қорақалпоғистон, Тошкент шаҳар, вилоятлар судларининг судлов ҳайъатлари судьялари ҳамда  жиноят ишлари бўйича туман (шаҳар) судларининг судьялари иштирок этдилар.

Мазкур тадбир жиноят ишларини юқори суд инстанцияларида кўрилишида процессуал асосларни қўллашда мавжуд бўлган тизимли камчилик ва муаммоларни муҳокама қилиш, муҳокама қилинаётган масалалар юзасидан Жиноят-процессуал кодексга  киритилган сўнгги янгиликлар ва ўзгартишларни амалиётда тўғри ҳамда бир хилда қўлланилишига эришиш борасида тушунтиришлар беришни ўз олдига мақсад қилиб қўйди.

Семинар давомида юқори суд инстанция судларида жиноят ишларини кўрилишининг назарий ва амалий  жиҳатлари, суд амалиётидаги муаммолар, шу билан бирга, мавзу доирасида суд ва прокуратура ходимлари эътибор қаратиши лозим бўлган ҳолатлар қизғин муҳокамага сабаб бўлди.

Тадбир иштирокчиларининг маърузаларида аниқ мисоллар асосида юқори инстанцияда жиноят ишларини кўрилишида суд ва прокуратура амалиётида йўл қўйилган камчиликлар хусусида тушунтиришлар бериб ўтилди.

Иштирокчилар фикрича, тадбирдан аввал жойлардан мавжуд муаммоларга оид маълумотлар йиғилиб, улар юзасидан муҳокамалар ўтказилгани ва тушунтиришлар берилгани мазкур вебинарнинг натижадорлигини белгилаб берган муҳим омил бўлди.

Тадбир якунида амалдаги қонунчиликни такомиллаштириш борасида ҳам бир қатор таклифлар илгари сурилиб, иштирокчилар ўзларини қизиқтирган саволларга жавоб олдилар.